Фото: ССВ

Президентимизнинг Гематологик ва онкогематологик касалликларга чалинган беморларга тиббий ёрдам кўрсатишни янада такомиллаштиришга бағишланган қарор лойиҳаси ишлаб чиқилди.

Унда ўзак ҳужайралари трансплантацияси, ўзак ҳужайралари банки, ген, иммун терапия каби энг замонавий ва илғор юқори технологик даволаш усулларини жорий қилиш, беморларни сифатли дори ва сарфлов воситалари, тиббиёт муассасаларини замонавий тиббий жиҳозлар билан таъминлаш ва молиялаштиришни изчил давом эттириш масалалари қамраб олинган.

Шунингдек, аҳоли орасида гематологик ва онкогематологик касалликларни эрта босқичларда аниқлаш ҳолатлари улушини 60 фоизгача ошириш, гематологик хасталикларга чалинганларни 100 фоиз ихтисослаштирилган тиббий ёрдам билан қамраб олиш, гемопоэтик ўзак ҳужайралари трансплантация амалиётларини ҳудудларда жорий қилиш мақсад қилинган.

Бунда қон касалликларига бирламчи шубҳаларни барвақт аниқлаш бўйича сўровнома ишлаб чиқилиб, тиббий кўриклар ўтказилади. Шунингдек, бирламчи скрининг тартиб-қоидаларига тиббиёт бригадаси ходимларини ўқитиш орқали уларнинг гематологик касалликлар бўйича ҳушёрлигини ошириш назарда тутилган.

Беморларни йўналтиришнинг 3 босқичли янги тизими жорий этилади. У касалликларни туман даражасида аниқлаш ва бирламчи ташхис қўйиш, ҳудудий ва республика даражаларида ташхисни тасдиқлаш ва юқори технологик даволаш, реабилитация қилиш ва паллиатив ёрдам кўрсатиш тамойили бўйича ишлайди.

Республика ихтисослаштирилган гематология илмий-амалий тиббиёт маркази ҳузурида юридик шахс бўлмаган Қон ва ўзак ҳужайралари криобанки ҳамда Трансплантация, ҳужайра, ген ва иммун терапия даволаш илмий клиник марказини ташкил этиш кўзда тутилган.

Шунингдек, ушбу Марказда гематологик ва онкогематологик касалликларга чалинган беморларни ташхислаш, ҳужайра, ген ва иммун даволаш ҳамда ҳудудларда реабилитация қилишнинг янги модели жорий этилади.

Олий таълим, фан ва инновациялар вазирлиги билан биргаликда Марказда илмий йўналишдаги «Гемофилия», «Клиник гемостазиология» ҳамда «Қон касалликларни инновацион даволаш» бўйича Миллий илмий мактаб яратиш режалаштирилмоқда.