Фарғона вилояти Тошлоқ туман давлат ижрочилари томонидан алимент тўламасликнинг оқибатлари тушунтирилган қарздор фарзандларининг моддий таъминоти учун 10 минг 500 АҚШ доллари тўлади. Бу ҳақда МИБ матбуот котиби Фаррух Тошпўлатов «Халқ сўзи»га маълум қилди.

Билдирилишича, фуқаролик ишлари бўйича Марғилон туманлараро судининг 2015 йил 5 февралдаги ижро варақасига асосан қарздор М.Н.дан ундирувчи Н.М. фойдасига 1 нафар фарзандининг моддий таъминоти учун алимент ундириш белгиланган.

Бироқ ота ўз фарзандининг моддий таъминотидан узоқ вақт бўйин товлаб келган. Шу боис, қарздор фуқарога нисбатан тўпланган ҳужжатлар Маъмурий жавобгарлик тўғрисидаги кодекснинг 47⁴ -моддасига асосан Жиноят ишлари бўйича Тошлоқ тумани судига юборилган.

Маъмурий иш жорий йилнинг 20 февраль куни судда кўриб чиқилиб, 100,1 млн сўм миқдорида алимент пулларини тўламаган қарздор М.Н.га суд томонидан 15 сутка маъмурий қамоқ жазоси тайинланган.

Шунингдек, 15 сутка маъмурий жазони ўтаб чиққан қарздор ўзига тегишли хулоса чиқармаганлиги ва яна 2 ойдан ортиқ алимент пулларини тўламай келаётганлиги сабабли у билан тушунтириш олиб борилган. М.Н.га тўловлардан бу тарзда бўйин товлаётганлиги учун Жиноят кодексининг 122-моддасида кўрсатилган тартибда 1 йилгача озодликдан маҳрум бўлиши мумкинлиги айтилган.

Шундан сўнг, жазодан қўрққан ота ўша кунинг ўзида жами 10 минг 500 АҚШ доллари миқдорида алимент пулларини ундирувчига тилхат асосида топширган.