Туркия президенти Режеп Таййип Эрдоған коронавирус билан боғлиқ вазият туфайли мамлакатда 29 апрелдан 17 майгача тўлиқ карантин эълон қилди.

Мамлакат раҳбари бу ҳақда Вазирлар Маҳкамаси мажлиси якунлари бўйича телевизион мурожаатида айтиб ўтган.

“Ана шундай чора-тадбирлар туфайли биз натижаларга эриша бошладик. Рамазондан кейин одатий ҳаётга қайтишимиз учун янги ҳолатлар сонини кунига беш минггача камайтиришимиз керак. Aкс ҳолда, биз сайёҳлик фаолиятига қайта олмаймиз. Мамлакатда 29 апрель соат 19.00 дан 17 май соат 5.00 гача тўлиқ карантин жорий этилади”, деди Эрдоған.

Ушбу даврда барча идоралар ва иш жойлари ёпилади, фақат Ички ишлар вазирлиги томонидан келишилган ҳолатлар бундан мустасно бўлади.

“Шаҳарлараро саёҳатлар, албатта. рухсатнома билан амалга оширилади, жамоат транспорти 50 фоиз чеклама билан ишлайди”, дея қўшимча қилган Эрдоғон.

16 апрель куни Туркияда коронавирус юқтирганлар сонининг кунлик ўсиши пандемия бошидан бери максимал даражани кўрсатди. Бу ерда бир кунда 63 082 кишида инфекция аниқланган. 21 апрелда эса рекорд даражада ўлим қайд этилди — 362 та.