Иминжон ота Темировни шу йилнинг 30 апрель куни Марҳамат туманидаги 563-референдум участкасида учратдик. 98 ёшни қарши олган отахон набиралари қуршовида муҳим сиёсий жараёнда иштирок этар экан, келажагимизга бефарқ эмаслигини ўзининг фаоллиги билан ифода этди ва бошқаларга ибрат бўлди.

- Уруш йилларини кўрган, очарчилик азобини тортган инсонлар учун бугунги кунимиз жаннатнинг бир бўлагидек гап,-дейди Иминжон ота суҳбатда. – Фронт ортида ҳам, фронтда ҳам ватанимиз озодлиги, халқимиз хурлиги учун курашдик, шу кунларни орзиқиб кутдик. Мана, юртимиз тинч, ҳаётимиз осуда! Илоҳим, уруш кўрмайлик. Мамлакатимизда ҳар доим озодлик ҳукм сурсин!

Бугун Андижон вилоятида истиқомат қилаётган 1941-1945 йиллардаги уруш қатнашчилари сони 6 нафарни ташкил этади. Уларнинг ҳар бирига давлатимиз раҳбарининг шу йил 2 май кунги “Иккинчи жаҳон уруши қатнашчиларини рағбатлантириш тўғрисида”ги Фармони ўқиб, эшиттирилди. Президентимиз, ҳукуматимизнинг эътибори қалбларга шуур олиб кирди.

- Ҳамма гап эътиборда,-дейди Иминжон ота Темиров. –Бизни ҳурмат қилиб, эслаганлари учун дуодамиз! Илоҳим, юртимиз тинч осмонимиз ҳар доим мусаффо бўлсин!

Саминжон ҲУСАНОВ, “Халқ сўзи”