Буюк Британияда коронавирус инфекциясининг яна бир мутацияси аниқланган. Бу ҳақда Буюк Британиянинг соғлиқни сақлаш вазири Метт Хенкок маълум қилди. Ушбу штамм мамлакат ҳудудига Жанубий Африка Республикасидан кириб келган. У янги штамм янада юқумли эканлигини айтмоқда.

«Шу муносабат билан Буюк Британия ҳукумати Жанубий Африка Республикасига саёҳат қилишга чеклов ўрнатади, шунингдек, ушбу мамлакатдан келганлар ва улар билан мулоқотда бўлганлар учун икки ҳафталик мажбурий карантин жорий қилинади», деган вазир.

14 декабрь куни Буюк Британия олимлари мамлакатда олдин маълум штаммлардан тезроқ тарқаладиган вируснинг янги мутациясини аниқлашганини маълум қилишди.

Кучли эпидемиологик вазият туфайли 20 декабрдан Буюк Британиянинг жануби-шарқида ва Лондонда максимал тўртинчи даражадаги чекловлар жорий этилди. Одамларга уйларидан чиқмаслик тавсия қилинди.

Қирққа яқин мамлакат, шу жумладан, Ўзбекистон ҳам Буюк Британия билан транспорт алоқаларини тўхтатганини маълум қилди. Кейинчалик ушбу мутация Италия, Германия, Дания, Австрия, Австралия, Нидерландия ва Жанубий Африка Республикасида ҳам аниқлангани маълум қилинди.

Кейинчалик Буюк Британияда аниқланган коронавируснинг янги штамми болалар учун хавфли экани маълум қилинди.