Фото: Президент матбуот хизмати

Президент самарқандлик тадбиркорлар интенсив балиқ етиштириб, ҳосилдорликни 4-5 карра ошириш учун панель ўрнатиш харажатини қисман қоплаш ва кафолатли сув билан таъминлашни сўрагани ҳақида гапирди.

Йиғилишда бу таклиф қўллаб-қувватланиб, жорий йил 1 майдан бошлаб қуёш панеллари учун 16 фоизли кредит ажратилиши белгиланди. Панелни ўз маблағидан ўрнатганларга 25 фоиз харажати қоплаб берилади.

Ўтган йили республикада 88 минг гектарда картошка етиштиришга 400 миллиард сўм берилган. Лекин жойларда иш тўғри ташкил қилинмагани учун 48 минг гектарда картошка экилмасдан қолган. Берилган маблағнинг 25 фоизи ишлатилди, холос.

Жорий йилда 135 минг гектар, хусусан, Самарқандда 22 минг гектарда картошка экиш режа қилинган. Мутасаддилар бу йил режадаги ҳар бир қарич ерга картошка ўз вақтида экилиши шартлиги ҳақида огоҳлантирилди.

Жумладан, Мисрдан 250 минг дона картошка мини туганаги олиб келиниб, Булунғур туманида кўпайтириш бошланади. Голландиядан 6 минг тонна уруғлик картошка олиб келиниб, фермерларга устамасиз етказиб берилади.

Шу ўринда Оқдарё туманида 10 миллион дона картошка мини туганаклари чиқариш қувватига эга “in-vitro” лабораторияси ишга тушгани таъкидланди. У ерда тайёрланган 40 минг тонна супер элита уруғини деҳқонларга бепул тарқатиш топширилди.