Вазирлар Маҳкамасининг 2020 йил 17 сентябрдаги 560-сонли қарори билан «Бўстонлиқ туманидаги бўш, фойдаланилмаётган ва самарасиз фойдаланилган объектлардан ва ер участкаларидан самарали фойдаланиш, уларни туризм ва сервис инфратузилмаси асосида ташкил этиш чора-тадбирлари» ишлаб чиқилган. Шунингдек, қарор билан 26 та йирик дам олиш зонаси ва 35 та бўш турган давлат объекти реализацияга таклиф этилади.

Яқинда тадбиркорлар ва ОАВ вакилларига ушбу объектларнинг айримлари бўйлаб инфотур ташкил этилди. Чорвоқ эркин туристик зонаси дирекцияси раҳбарининг биринчи ўринбосари Азиз Нагаев, раҳбар ўринбосари Отабек Бабамурадов, бош мутахассис Бекзод Сафаров, Туризм ва спорт вазирлиги бўлим бошлиғи Аброр Мунавваров, e-ijro аукциони мутахассиси Бобур Турсунов, Давлат активларини бошқариш агентлиги бошқарма бошлиғи Руслан Бекчановлар тадбир иштирокчиларига ҳамроҳлик қилишди.

«Инфотур доирасида тадбиркорлар ва ОАВ вакиллари Чорвоқ сув омбори бўйлаб тоғли ҳудудлар ҳамда қирғоқдан унчалик узоқ бўлмаган жойда жойлашган 12 та дам олиш маскани билан яқиндан таништирилди (Экономист дам олиш зонаси, «Чотқол» санаторийси бинолари ва иншоотлари, собиқ таянч пункти ва унга туташ ҳудуд, «Лингвистлар» спорт-соғломлаштириш оромгоҳи, «Сойлиқ» дам олиш зонаси, «Институт» рангли лагерь металлар, «Гидроэнергетик» спорт-соғломлаштириш оромгоҳи, Тиббиёт академиясининг собиқ қароргоҳи, «Зумрад сервис» МЧЖ, бинолар ва иншоотлар ва ер участкалари Ғазалкент Сувоқова, «Геобуртехника» ДАТК дам олиш маскани, ҳар хил ўлчамдаги фойдаланилмаётган эски бинолар). Шунга мувофиқ, бу объектлар тадбиркорларда меҳмонхона мажмуаларини яратиш билан бир қаторда замонавий ва кенг кўламли туристик кўнгилочар хизматларни йўлга қўйишига умид билдирамиз», - деди Чорвоқ эркин туристик зонаси дирекцияси раҳбари ўринбосари Отабек Бабамурадов.

Барча объектлар оммавий кимошди савдоси орқали реализация қилиниб, уларнинг аксарияти «E-Ijro auksion» электрон савдо майдончаси орқали амалга оширилади, шу боис инфотур доирасида масъул мутахассислар барча - кимошди савдосида қатнашишдан тортиб то кўчмас мулк ҳужжатларини расмийлаштиришга доир саволларгача батафсил жавоб беришди.

Тадбиркорлар давлат ташкилотлари томонидан сотувга қўйилган ва қўйилиши кутилаётган ер участкалари бўйлаб бундай инфотурларнинг ўтказилиши ер участкалари савдоси билан боғлиқ жараёнларнинг очиқ ва шаффоф ўтишида муҳим аҳамиятга эга эканлигини таъкидлашди.

Туризм ва спорт вазирлиги матбуот хизматининг маълум қилишича, бу каби инфотурлар мунтазам равишда ўтказилади. Инфотур ва объектларга оид зарур маълумотларни uzbektourism.uz, davaktiv.uz, elektron - auksion.uz сайтлари орқали топиш мумкин бўлади.