Аввалроқ, АОКАда "Ўзбекистонда коронавирус билан боғлиқ вазият, вакцинация жараёнларига тайёргарлик" мавзусида матбуот анжумани бўлиб ўтаётгани ҳақида хабар берган эдик.

"Хабарингиз бор, биз фақат "AstraZeneca/Oxford" вакцинасинигина эмас, бошқа вакциналардан ҳам фойдаланишни режалаштирганмиз. "Спутник V" вакцинасидан 1 миллион доза олиб келиш тўғрисида музокаралар олиб борилмоқда. Бунинг натижасида тегишли шартнома имзоланади. 

Бунда асосий масала "Спутник V" вакцинасини Ўзбекистонга олиб келиш. Чунки биз аҳолимиз учун тезроқ олиб келинсин, тезроқ эмлашни бошласин, деган умидда юрибмиз.

Ўз навбатида ишлаб чиқариш ҳажмлари айнан Россия Федерацияси ва бошқа давлатларда етарли эмас.  Шу учун биз тараф тезроқ олиб келиш ва кўп миқдорда олиб келиш масалалари кўрилмоқда", деди Юсупалиев.

Шунингдек, Юсупалиев Ўзбекистонда синовдан ўтказилган Хитойнинг коронавирусга қарши вакцина ҳақида ҳам сўз юритиб, бунинг катта ютуқ эканлигини таъкидлади. 

"Ўзбекистон ва Хитой ҳамкорлигида яратилган "ZF-UZ-VAC2001" вакцинамиз ҳам бор.

Шунингдек, Хитой вакцинасини олиб келиш бўйича ҳам музокара олиб борилмоқда.

Энг асосийси бу вакцинани ўзимизда, ўзимизнинг аҳолида синаб кўрдик. Мен ўйлайманки бу жуда катта ва муҳим масала. 

Мисол учун, биз "AstraZeneca/Oxford" вакцинасини синамаганмиз. Қўл билан ушламаганмиз, кўрмаганмиз. Лекин бу вакцинани ўзимизда синаганмиз. Натижада қанчалар антитана ишлаб чиқарилишини ҳам биламиз", деди у.

Инобат АҲАТОВА, "Халқ сўзи"