Дональд Трампнинг аккаунтлари Twitter томонидан блокланиб, Parler ижтимоий тармоғидан узиб қўйилгандан сўнг, АҚШда Telegram мессенжери жадал оммалашяпти. Бу ҳақда The Telegraph нашри маълум қилди.

Хабар берилишича, ўтган якшанба куни телеграм Америкада энг кўп кўчириб олинган иккинчи иловага айланган. Уни бир кунда ярим миллиондан ортиқ киши юклаб олган. Бу бир ҳафта олдинги ҳолатдан уч баробар кўпдир.

Кескин ўсиш билан боғлиқ мазкур ҳолат Трамп тарафдорлари айнан шу мессенжерга ўтаётгани, шунингдек, WhatsApp томонидан эълон қилинган янги махфийлик сиёсати билан изоҳланмоқда.

Бундан олдин твиттер Трампнинг аккаунтини «зўравонликни бундан буён ҳам қўзғатиш хавфи борлиги» учун «музлатиб» қўйган эди. Оқ уй раҳбарининг Facebook ва Instagram тармоқларидаги манзиллари ҳам турли муддатларга ёпиб қўйилган.

АҚШнинг 45-президенти томонидан 6 январь куни конгресс биносига бостириб кирган намойишчиларга қилган мурожаати юқоридаги каби «қулфланиш»га сабаб қилиб кўрсатилганди. Қайд этилишича, Трамп шу орқали ноябрда ўтказилган сайлов якунлари тасдиқланишига халақит бермоқчи бўлган.

Спутник тарқатган сўнгги маълумотларга кўра, АҚШда Байден қасамёди кунига қадар қуролли намойишларга тайёргарлик кўриляпти.