Бугун Олий Мажлис Қонунчилик палатасининг ялпи мажлисида Маьмурий жавобгарлик кодексининг 65-моддасига биринчи қўшимча сифатида томорқадан фойдаланмаганлик учун жарима белгилаш масаласи кўриб чиқилади.

Қонун лойиҳаси “Миллий тикланиш” фракцияси йиғилишида жиддий муҳокамага сабаб бўлди. Қонун лойиҳасининг диспозицияси “огоҳлантирилганидан кейин, экмаслик учун асоси бўлмаган” (!) томорқа эгаларини жаримага тортиш йўналишида ўзгартирилди.

Бундан ташқари, томорқадан самарали фойдаланганлик учун рағбатлантириш механизмларини янада такомиллаштириш мақсадида Ҳукумат қарори қабул қилинмоқда.

Бу бизни қониқтиради.

Нега? Халқаро экспертларнинг тахминларига кўра пандемиядан кейинги даврда бутун дунёда 1,6 миллиард инсон очарчиликка дуч келиши кутиляпти. Кескин озиқ-овқат етишмовчилиги юзага келади.

Шундай шароитда ери яхши, суви бор, шароити бўлиб туриб томорқасига ўзи учун, ўзи хоҳлаган бирон нарса экмаган фуқарони жаримага тортишга қарши эмасмиз. Экмаслик учун асоси бўлган хонадонлар жаримага тортилмайди (!)

Алишер ҚОДИРОВ,

Олий Мажлис Қонунчилик палатаси Спикери ўринбосари,

“Миллий тикланиш” демократик партияси фракцияси раҳбари