Фото: Иллюстратив фото

Ўзбекистон Ташқи ишлар вазири Абдулазиз Комилов ва АҚШ Давлат котиби Энтони Блинкен ўзаро табрик йўллади.

Жорий йилнинг 19 февраль куни Абдулазиз Комилов ва Энтони Блинкен икки давлат ўртасида дипломатик муносабатлар ўрнатилганининг 30 йиллиги муносабати билан ўзаро табрик йўллади.

Комилов сўнгги йилларда Ўзбекистон ва АҚШ ўртасидаги муносабатлар янги ривожланиш босқичига кўтарилганини таъкидлади. Мамлакатлар сиёсат, иқтисодиёт, инсон ҳуқуқлари ва маданият соҳаларидаги кенг кўламли масалалар бўйича ўзаро ҳурмат тамойили асосида муваффақиятли ҳамкорлик қилмоқда.

Ўзбекистон ташқи ишлар вазири АҚШ билан халқаро ва минтақавий форматлар, жумладан, C5+1 механизми доирасидаги самарали ҳамкорликни қайд этди. Шунингдек, у Афғонистон халқига ёрдам бериш учун кучларни бирлаштириш муҳимлигини таъкидлади.

Блинкен Ўзбекистонда амалга оширилаётган кенг кўламли сиёсий ва иқтисодий ўзгаришлар дастурини юқори баҳолади ва Америка томони Ўзбекистоннинг ўзининг улкан мақсадларига эришиш йўлидаги саъй-ҳаракатларини бундан буён ҳам қўллаб-қувватлашга тайёрлигини таъкидлади.

Давлат котиби АҚШ Ўзбекистондаги ислоҳотлар йўналишини ҳар томонлама қўллаб-қувватлаш ва конструктив ҳамкорликни давом эттиришга содиқлигини таъкидлади.