Саминжон ҲУСАНОВ/«Халқ сўзи». Избоскан туманидаги 63 та МФЙ томонидан минглаб эътибор ва ғамхўрликка муҳтож фуқароларга моддий ва маънавий ёрдам кўрсатилди.

— Маҳалламизда 7195 нафар аҳоли истиқомат қилади, — дейди «Инсон» ижтимоий хизматлар марказининг «Истиқлол» МФЙдаги ходими Саидисломхон Сайдаҳмедов. — Шулардан 578 нафарини гуруҳ ногиронлиги мавжуд. Кам таъминланган. Ўзгалар парваришига муҳтож. Ота-она қарамоғидан маҳрум бўлган фуқароларни ташкил этади. Уларнинг яшаш шароитини ўрганиб, амалий ёрдам кўрсатилди.

Озодлик кўчасида яшовчи Муаттарой Обиджонова «Танглай ёрилиши» касаллиги билан дунёга келган. 2 ёшлигида 3 марта жарроҳлик амалиётини бошидан кечирган. Унинг устига қулоқ эшитмаслик касаллигини орттириб олган.

— Яхши эшитмаслигим сабабли дарсларни ўзлаштиришга қийналардим, — дейди у суҳбатда. — Тенгдошларим билан мулоқотга киришишда муаммоларга дуч келардим. Ижтимоий ходим кўмаги ва тиббиёт ходимлари тавсияси билан эшитиш мосламасига эга бўлдим. Қувонарлиси, 9 йилда илк бор ўз овозимни эшитдим.

Халқ манфаатларига хизмат қилувчи бундай ислоҳотлар аҳолининг мушкулини осон қилмоқда.