Saminjon HUSANOV/“Xalq soʻzi”. Izboskan tumanidagi 63 ta MFY tomonidan minglab eʼtibor va gʻamxoʻrlikka muhtoj fuqarolarga moddiy va maʼnaviy yordam koʻrsatildi.

— Mahallamizda 7195 nafar aholi istiqomat qiladi, — deydi “Inson” ijtimoiy xizmatlar markazining “Istiqlol” MFYdagi xodimi Saidislomxon Saydahmedov. — Shulardan 578 nafarini guruh nogironligi mavjud. Kam taʼminlangan. Oʻzgalar parvarishiga muhtoj. Ota-ona qaramogʻidan mahrum boʻlgan fuqarolarni tashkil etadi. Ularning yashash sharoitini oʻrganib, amaliy yordam koʻrsatildi.

Ozodlik koʻchasida yashovchi Muattaroy Obidjonova “Tanglay yorilishi” kasalligi bilan dunyoga kelgan. 2 yoshligida 3-marta jarrohlik amaliyotini boshidan kechirgan. Uning ustiga quloq eshitmaslik kasalligini orttirib olgan.

— Yaxshi eshitmasligim sababli darslarni oʻzlashtirishga qiynalardim, — deydi u suhbatda. — Tengdoshlarim bilan muloqotga kirishishda muammolarga duch kelardim. Ijtimoiy xodim koʻmagi va tibbiyot xodimlari tavsiyasi bilan eshitish moslamasiga ega boʻldim. Quvonarlisi, 9-yilda ilk bor oʻz ovozimni eshitdim.

Xalq manfaatlariga xizmat qiluvchi bunday islohotlar aholining mushkulini oson qilmoqda.