Ayni paytda oʻzbekistonlik ziyoratchilar Makka va Madina shaharlarida boʻlib, Umra ibodatini ado etishmoqda. Ziyoratchilarimiz Saudiya Arabistonidagi Jidda shahriga yetib borgandan soʻng dastlab zamonaviy avtobuslarda Madina shahriga borib, barcha sharoitga ega boʻlgan “PullMan Zam Zam” mehmonxonasiga joylashdi. Keyin Madinai munavvaradagi ziyoratlarni boshlashdi.

Makkai mukarramada Oʻzbekistonning turli hududlaridan tashrif buyurgan ziyoratchilarimiz 5 vaqt namozlarini Harami sharifda ado etish baxtiga muyassar boʻlmoqda.

Maʼlumot oʻrnida aytish joizki, bu yerda ziyoratchilarimiz Savr va Nur togʻlari, Arafot maydoni, Mino, Muzdalifa vodiylari kabi moʻtabar qadamjolarga tashrif buyuradilar.

Endi ziyoratchilarga yaratilgan qulayliklar haqida qisqacha toʻxtalib oʻtsam. Jumladan, aynan “PullMan Zam Zam” mehmonxonasining tanlangani ham biz, ziyoratchilar uchun bir qator qulayliklar tugʻdirmoqda. Chunki keksa yoshdagilarning besh vaqt namozlarni ado etishlari oson kechyapti. Derazadan koʻrinib turgan Harami sharifga yayov borish uchun hech qancha vaqt ketmaydi.

Zamon talablari darajasida jihozlangan mehmonxonada ziyoratchilar uchun uch mahal issiq ovqat, tabiiy sharbatlar, shirin pishiriqlar, meva-sabzavotlar tortiq etilmoqda. Aslida gap bunda ham emas, balki oʻzbekistonlik ziyoratchilarga koʻrsatilayotgan alohida hurmat-ehtiromdadir.

Yon-atrof, shahar koʻchalari kechasi yanada fayzli, kunduzi ham sokin va tarovatli. Zamonaviy yoritish uskunalari bilan taʼminlangan butun hudud tunda ham kunduzdek, goʻyo. Aholiga xizmat koʻrsatish shoxobchalari ishlab turibdi.

Bir soʻz bilan aytganda, oʻzbekistonlik ziyoratchilar Umra ibodatini yuqori darajada ado etishmoqda. Bu esa mamlakatimizda ushbu yoʻnalishda roʻyobga chiqarilayotgan islohotlarning amaliy ifodasidir.

Shodiyor MUTAHAROV, “Xalq soʻzi”.

(Saudiya Arabistoni Jidda shahridan maxsus)