Фото: Муаллиф

Айни пайтда ўзбекистонлик зиёратчилар Макка ва Мадина шаҳарларида бўлиб, Умра ибодатини адо этишмоқда. Зиёратчиларимиз Саудия Арабистонидаги Жидда шаҳрига етиб боргандан сўнг дастлаб замонавий автобусларда Мадина шаҳрига бориб, барча шароитга эга бўлган “PullMan Zam Zam” меҳмонхонасига жойлашди. Кейин Мадинаи мунавварадаги зиёратларни бошлашди.

Маккаи мукаррамада Ўзбекистоннинг турли ҳудудларидан ташриф буюрган зиёратчиларимиз 5 вақт намозларини Ҳарами шарифда адо этиш бахтига муяссар бўлмоқда.

Маълумот ўрнида айтиш жоизки, бу ерда зиёратчиларимиз Савр ва Нур тоғлари, Арафот майдони, Мино, Муздалифа водийлари каби мўътабар қадамжоларга ташриф буюрадилар.

Энди зиёратчиларга яратилган қулайликлар ҳақида қисқача тўхталиб ўтсам. Жумладан, айнан “PullMan Zam Zam” меҳмонхонасининг танлангани ҳам биз, зиёратчилар учун бир қатор қулайликлар туғдирмоқда. Чунки кекса ёшдагиларнинг беш вақт намозларни адо этишлари осон кечяпти. Деразадан кўриниб турган Ҳарами шарифга яёв бориш учун ҳеч қанча вақт кетмайди.

Замон талаблари даражасида жиҳозланган меҳмонхонада зиёратчилар учун уч маҳал иссиқ овқат, табиий шарбатлар, ширин пишириқлар, мева-сабзавотлар тортиқ этилмоқда. Аслида гап бунда ҳам эмас, балки ўзбекистонлик зиёратчиларга кўрсатилаётган алоҳида ҳурмат-эҳтиромдадир.

Ён-атроф, шаҳар кўчалари кечаси янада файзли, кундузи ҳам сокин ва тароватли. Замонавий ёритиш ускуналари билан таъминланган бутун ҳудуд тунда ҳам кундуздек, гўё. Аҳолига хизмат кўрсатиш шохобчалари ишлаб турибди.

Бир сўз билан айтганда, ўзбекистонлик зиёратчилар Умра ибодатини юқори даражада адо этишмоқда. Бу эса мамлакатимизда ушбу йўналишда рўёбга чиқарилаётган ислоҳотларнинг амалий ифодасидир.

Шодиёр МУТАҲАРОВ, «Халқ сўзи».

(Саудия Арабистони Жидда шаҳридан махсус)