Foto: Халқ сўзи

Ayni kunlarda mamlakatimizning barcha hududlarida boʻlgani kabi Fargʻona viloyati shahar va tumanlaridagi mudofaa ishlari boʻlimlari tomonidan chaqiriluvchilar tantanali ravishda muddatli harbiy xizmatga kuzatilmoqda.

— Prezidentimizning joriy yil 22-fevral kuni qabul qilingan “Oʻzbekiston Respublikasi fuqarolarining muddatli harbiy xizmatga navbatdagi chaqiruvi hamda belgilangan xizmat muddatini oʻtab boʻlgan muddatli harbiy xizmatchilarni Qurolli Kuchlar rezerviga boʻshatish toʻgʻrisida”gi qarori asosida viloyatda mart-aprel oylarida harbiy xizmatga kuzatish tadbirlari oʻtkaziladi, — deydi Fargʻona viloyati mudofaa ishlari boshqarmasi boshligʻi Neʼmatilla Gʻafurov. — Shu maqsadda shahar-tuman mudofaa ishlari boʻlimlari huzuridagi hududiy va hududiy-tibbiy komissiyalari, mudofaa ishlari boshqarmasi huzuridagi rahbariyat kengashi hamda harbiy-tibbiy komissiyalarida Qurolli Kuchlar safini sogʻlom, jismonan baquvvat, bilimli va vatanparvar chaqiriluvchilar bilan butlash boʻyicha ishlar olib borilyapti.

Harbiy xizmatga chaqiriluvchilar shahar-tuman mudofaa ishlari boʻlimida mahalla faollari, ota-onalar, yoshlar, faxriylar hamda keng jamoatchilik oldida yigitlik vaʼdasini berish marosimlari tashkil etilmoqda.

— Bugun nabiram Abdulaziz Qodirovni Vatan oldidagi yigitlik burchini oʻtash uchun joʻnatdik, — deydi Fargʻona shahrida yashovchi Faridaxon Roʻzimatova. — U bolaligidan harbiy boʻlishni orzu qiladi. Harbiy xizmat davomida yanada chiniqib, har tomonlama kamolga yetishiga va orzulari ushalishiga ishonaman.

Botir Madiyorov, “Xalq soʻzi”.