Foto: Xalq so‘zi

Mamlakatimizga tovar-moddiy boyliklarini olib kirishning qatʼiy tartiblari belgilangan va ularga rioya etmaslik qonuniy javobgarlikka sabab boʻladi. Afsuski, buni bilsada, qonun-qoidalarni chetlab oʻtishga urinuvchi shaxslar oramizda uchrab turishi esa sir emas.

— Masalan, Andijon viloyatidagi “Doʻstlik” chegara bojxona posti orqali yurtimizga kirib kelgan “DAF” rusumli yuk avtotransport vositasi belgilangan tartibda bojxona koʻrigidan oʻtkazilganida yuk kuzatuv hujjatlarida koʻrsatilmagan 26 turdagi, umumiy qiymati 2 mlrd. soʻmdan ziyod mahsulotlar mavjudligi aniqlandi, — deydi Andijon viloyat bojxona boshqarmasi katta inspektori Sardorbek Oʻrinboyev. — Maishiy texnika vositalari, kanselyariya mahsulotlari va turli kiyim-kechaklardan iborat ushbu mollar yuzasidan bojxona toʻlovlarini chetlab oʻtishga uringan haydovchi sodir etgan noqonuniy xatti-harakati yuzasidan surishtiruvga jalb etildi.

Huquqni muhofaza qiluvchi idoralar tomonidan bu kabi holatlarning oldini olish maqsadida qoʻshma nazorat tadbirlari tashkil etilib, noqonuniy xatti-harakatlar yuzasidan tegishli choralar koʻrilmoqda.

Saminjon HUSANOV, “Xalq soʻzi”.