“Xotin-qizlar huquqlarini himoya qilishda raqamli va intellektual texnologiyalardan foydalanish” mavzusiga bagʻishlangan ushbu anjuman Xitoy, Malayziya, Misr hamda BMTning bir qator tuzilmalari (BMT-Ayollar, YUNFPA) hamkorligida tashkil etildi.

Tadbirning asosiy sessiyasida Inson huquqlari boʻyicha Oʻzbekiston Respublikasi Milliy markazi direktori oʻrinbosari Dilnoza Muratova maʼruza qildi.

Oʻzbekiston vakili oʻz nutqida quyidagi muhim jihatlarga toʻxtaldi:

Yangi Oʻzbekistonda xotin-qizlarning raqamli savodxonligini oshirish va ularning innovatsiyalar sohasidagi ishtirokini kengaytirish boʻyicha davlat siyosati;

Onlayn makondagi zoʻravonlik, kamsitish va algoritmik gender tarafkashligi kabi zamonaviy tahdidlarning oldini olish;

Ayollarning odil sudlovdan foydalanish imkoniyatini taʼminlashda zamonaviy texnologiyalar va huquqiy mexanizmlarni integratsiya qilish.

Tadbirda, shuningdek, “BMT-Ayollar” tuzilmasi ijrochi direktori Sima Baxus, Xitoy va Malayziya delegatsiyalari rahbarlari hamda xalqaro ekspertlar ishtirok etib, sunʼiy intellekt va katta maʼlumotlar (Big Data) yordamida xotin-qizlarning iqtisodiy imkoniyatlarini kengaytirish tajribalari bilan oʻrtoqlashdilar.

Mutaxassislarning fikricha, Oʻzbekistonning ushbu nufuzli minbardagi ishtiroki mamlakatning gender tenglik yoʻlida xalqaro hamjamiyat bilan faol hamkorlikka tayyor ekanini yana bir bor tasdiqladi.