“Хотин-қизлар ҳуқуқларини ҳимоя қилишда рақамли ва интеллектуал технологиялардан фойдаланиш” мавзусига бағишланган ушбу анжуман Хитой, Малайзия, Миср ҳамда БМТнинг бир қатор тузилмалари (БМТ-Аёллар, ЮНФПА) ҳамкорлигида ташкил этилди.

Тадбирнинг асосий сессиясида Инсон ҳуқуқлари бўйича Ўзбекистон Республикаси Миллий маркази директори ўринбосари Дилноза Муратова маъруза қилди.

Ўзбекистон вакили ўз нутқида қуйидаги муҳим жиҳатларга тўхталди:

Янги Ўзбекистонда хотин-қизларнинг рақамли саводхонлигини ошириш ва уларнинг инновациялар соҳасидаги иштирокини кенгайтириш бўйича давлат сиёсати;

Онлайн макондаги зўравонлик, камситиш ва алгоритмик гендер тарафкашлиги каби замонавий таҳдидларнинг олдини олиш;

Аёлларнинг одил судловдан фойдаланиш имкониятини таъминлашда замонавий технологиялар ва ҳуқуқий механизмларни интеграция қилиш.

Тадбирда, шунингдек, “БМТ-Аёллар” тузилмаси ижрочи директори Сима Бахус, Хитой ва Малайзия делегациялари раҳбарлари ҳамда халқаро экспертлар иштирок этиб, сунъий интеллект ва катта маълумотлар (Big Data) ёрдамида хотин-қизларнинг иқтисодий имкониятларини кенгайтириш тажрибалари билан ўртоқлашдилар.

Мутахассисларнинг фикрича, Ўзбекистоннинг ушбу нуфузли минбардаги иштироки мамлакатнинг гендер тенглик йўлида халқаро ҳамжамият билан фаол ҳамкорликка тайёр эканини яна бир бор тасдиқлади.