Angliya Premyer-ligasi qoidalarini buzgani uchun “Chelsi” klubiga nisbatan jazo choralari qoʻllandi. Klub akademiyasiga yangi oʻyinchilarni roʻyxatdan oʻtkazish 9 oyga taqiqlandi hamda 10,75 million funt sterling (13,7 million dollar) miqdorida jarima solindi.

Bunda klubning sobiq egasi Roman Abramovich davridagi moliyaviy hisobotlardagi kamchiliklar asos qilib olingan. Shu bilan birga, asosiy jamoa uchun futbolchilarni transfer qilishga darhol taqiq qoʻyilmadi va ochkolar kamaytirilmadi.

Premyer-liga maʼlumotlariga koʻra, klub oʻzi mustaqil ravishda moliyaviy hisobotlardagi notoʻliq maʼlumotlar va amalga oshirilmagan toʻlovlar haqida xabar bergan. Qoidabuzarlik holatlari 10-yildan ortiq vaqt oldin, aniqrogʻi 2011–2018-yillar oraligʻida sodir etilgan.

Qarorga koʻra, “Chelsi” 9 oy davomida akademiya oʻyinchilarini roʻyxatdan oʻtkaza olmaydi. Shuningdek, klub kattalar jamoasi transferlariga oid 2-yillik shartli jazo olgan. Bu degani, agar kelgusida yana qoidabuzarliklar aniqlansa, ushbu taqiq kuchga kiradi. Avvalroq klubga ochkolarni kamaytirish jazosi qoʻllanishi mumkinligi ham aytilgan edi, ammo bu chora tatbiq etilmadi.

Maʼlum boʻlishicha, 2022-yilda klubni sotib olgan BlueCo kompaniyasi yangi rahbariyati avvalgi boshqaruv davrida ayrim futbolchilar uchun litsenziyaga ega boʻlmagan agentlar va uchinchi tomonlarga maxfiy toʻlovlar amalga oshirilganini aniqlagan. Bu toʻlovlar orasida Eden Azar, Samuel Etoʼo va Villian bilan bogʻliq bitimlar ham boʻlgan.

Premyer-liga klubning qoidabuzarliklarni tan olgani va tergov davomida faol hamkorlik qilganini jazoni yengillashtiruvchi omil sifatida baholagan.