Bugun, 2021-yilning 15-dekabr kuni Oʻzbekiston Respublikasi Advokatlar palatasi, Bosh prokuratura, “Mintaqaviy muloqot” xalqaro nodavlat tashkiloti, Toshkent shahar Ayollarni reabilitatsiya qilish va moslashtirish markazi hamkorligida “Advokatlar zoʻravonlikka qarshi” mavzuida davra suhbati oʻtkazildi.

Unda Bosh prokuror oʻrinbosari Svetlana Artikova, Amerika Qoʻshma Shtatlarining Oʻzbekistondagi favqulodda va muxtor elchisi Deniyel Rozenblyum, YEXHTning Oʻzbekistondagi loyihalar koordinatori elchi doktor Pyer Fon Arks, “Mintaqaviy muloqot” xalqaro nodavlat tashkiloti direktori Myusha Sever, Oʻzbekiston Respublikasi Advokatlar palatasi raisi Alim Ernazarov, palata advokatlari hamda soha mutaxassislari ishtirok etdi.

Tadbirda davlatimiz rahbari tashabbusi bilan keyingi yillarda mamlakatimizda xotin-qizlar muammolarini hal etish va ijtimoiy qoʻllab-quvvatlash, ularning huquqlarini taʼminlashda davlat organlari masʼuliyatini kuchaytirish, fuqarolik jamiyati institutlarining rolini oshirish, ayollarga nisbatan zoʻravonlik va tazyiqning har qanday koʻrinishiga barham berish borasida advokaturaning oʻrni muhokama qilindi.

AQSHning Oʻzbekistondagi favqulodda va muxtor elchisi Deniyel Rozenblyum oʻz soʻzida ayollarga nisbatan zoʻravonlik va tazyiqqa barham berish borasida Oʻzbekistonda keyingi yillarda amalga oshirilayotgan ishlar tahsinga sazovor ekanligini taʼkidladi.

Shuningdek, YEXHTning Oʻzbekistondagi loyihalar koordinatori elchi doktor Pyer Fon Arks mamlakatimizda ushbu yoʻnalishda amalga oshirilayotgan ishlarda hamkorlik qilishga tayyorligini bildirib, Oʻzbekiston amaliyotini boshqa davlatlarga ham targʻib qilish kerakligini qayd etdi.

Xotin-qizlar muammolarini hal etish va ijtimoiy qoʻllab-quvvatlash borasida Bosh prokuratura tomonidan davlat organlari bilan bir qatorda, xalqaro tashkilotlar, fuqarolik jamiyati institutlari, Advokatlar palatasi bilan hamkorlik ishlari davom etmoqda.