Afgʻoniston hukumati Pokistonning Qobuldagi narkologiya shifoxonasiga bergan zarbasi oqibatida 400 kishi halok boʻlganini bildirdi. Bu haqda, Tolo News telekanaliga tayanib, Afgʻoniston hukumati vakili Hamdulla Fitrat maʼlum qildi.

Uning maʼlumotlariga koʻra, jarohatlanganlar soni 250 kishiga yetgan.

Zarba 16-mart kuni kunduzi berilgan. Pokiston shifoxonaga hujum qilganlik haqidagi ayblovlarni rad etdi va oʻz zarbalari fuqarolik obyektlariga tegmaganini daʼvo qilmoqda. Mahalliy telekanallar vayron boʻlgan bino qoldiqlari ostidan halok boʻlganlarning jasadlari olib chiqilayotgani aks etgan videolavhalarni eʼlon qildi, deb xabar bermoqda CNN.

Pokiston va Afgʻoniston oʻrtasidagi mojaroning keskinlashuvi 2026-yilning fevral oyida boshlangan edi. Pokiston Mudofaa vazirligi mamlakat 2021-yildan beri Afgʻonistonni boshqarib kelayotgan Tolibonga qarshi “ochiq urush”ga kirishayotganini va mintaqada faoliyat yuritayotgan terrorchi guruhlar lagerlariga zarbalar berayotganini maʼlum qilgan edi.

Pokiston tomoni bu harakatlarni fevral oyida Islomobodda, shuningdek, mamlakat shimoli-gʻarbidagi Bajaur okrugi va Bannu shahrida sodir etilgan teraktlarga javob deb atagan. Oʻz navbatida, Tolibon va Afgʻoniston hukumati vakili Zabihulloh Mujohid Pokiston Harbiy-havo kuchlarining harakatlariga javoban Afgʻoniston qurolli kuchlari chegara boʻylab Pokiston postlariga hujum qilishini eʼlon qilgan.