Ҳусанбой ота ушлаган жойини қўйвормайдиган одам. Бир ишни бошладими, то якунига етказмагунча тинчимайди. У ўз манфаати учун эмас, халқни, қишлоқ одамларининг узоғини яқин қилиш учун елиб-югуради. Бўлмаса, 1968 йилдан буён битмаган иш учун ярим асрдан буён идорама-идора юрмас эди.

Гап шундаки, Избоскан туманидаги Катта қишлоқ маҳалласи ўртасидан оқиб ўтувчи Тентаксой дарёсига солинган эски кўприкни бундан ярим аср муқаддам сел ювиб кетган. Раҳбарларнинг эътиборсизлиги туфайли уни таъмирлаш шунча йилдан буён пайсалга солиб келинмоқда. Одамлар дарёнинг у томонига ўтиш учун 14 километр йўл босишга мажбур бўлишмоқда. Ҳусанбой ота кексаю ёшнинг, айниқса аёлларнинг йўл азобини тортаётганини кўриб, ачинади. Қанчадан-қанча идоралар эшигида сарғаяди. Аммо бу кўприкни таъмирлаш учун маблағ берилмайди. Раҳбарлар эса “Кейинги йил дастурига киритамиз” деган ваъдани беришдан чарчашмайди.

— Ҳатто собиқ иттифоқ даврида Леонид Брежневга ҳам шу кўприкни таъмирлаш юзасидан ариза ёзганман, — дейди Ҳусанбой ота Орифжонов. — Мустақиллик йилларида ҳам деярли мурожаат қилмаган раҳбар қолмаган. Ариза бўйича келиб кўришади, узунлиги 73 метр, эни 10 метрлик кўприкни қуриш учун катта маблағ талаб этилиши боис, ишни орқага суришади. Ниҳоят 2018 йилда Президентимиз Шавкат Мирзиёевга қилган мурожаатим туфайли муаммо ҳал бўлди. 6 миллиард 734 миллион сўм маблағ ажратилди, қурилиш бошланди ва 2020 йилда кўприк фойдаланишга топширилди.

Янги кўприк Избоскан ва Пахтаобод тумани аҳолиси учун қулайлик яратибгина қолмасдан, транспорт воситалари ҳаракати учун ҳам асосий восита вазифасини ўтамоқда. Натижада 500 минг нафардан зиёд аҳолига қулайлик яратилиб, узоғи яқин қилинди. Ҳусанбой отанинг ярим асрлик мурожаати ҳал этилди.

Мамлакатимизда фуқароларнинг ҳуқуқ ва эркинликлари, қонуний манфаатларини ҳимоя қилишда Халқ қабулхоналари ва виртуал қабулхоналарнинг аҳамияти беқиёс. Мазкур тизимнинг асоси бўлган Президент виртуал қабулхонаси ва Халқ қабулхоналари бевосита давлат раҳбарига мурожаат қилиш, халқ билан доимий мулоқот олиб бориш, одамларни қийнаб келаётган муаммоларни ўз вақтида самарали ҳал этишнинг таъсирчан механизмига айланди.

Избоскан туман Халқ қабулхонаси томонидан ҳам аҳолини қийнаётган муаммоларни ўрганиш, ижобий ҳал этиш, уларнинг ариза, шикоят ва мурожаатларида кўтарилган масалаларга ечим топиш борасида эътиборга молик ишлар олиб борилмоқда.

Халқ қабулхонасига Чўртонлиқ маҳалласидан Турсунбой Қўчқоров мактуб йўллаб, ўн йилдан буён қишлоқда янги мактаб қуришни сўраб мурожаат қилаётганини, лекин бирор натижа бўлмаётганини айтган. Мурожаат ўрганиб чиқилгач, кўп ўтмай дастурга киритилди. Тезкор амалга оширилган саъй-ҳаракатлар туфайли қишлоқ болалари янги мактабда қатнай бошлади. 210 ўринли мактаб Чўртонлиқ маҳалла аҳлига муносиб туҳфа бўлди.

Бундан ташқари, Ойбек маҳаллада яшовчи Боқижон Маҳмудов ўз мурожаатида Избоскан туманида хусусий шифохона очиб, аҳолига тиббий хизмат кўрсатиб келаётганини маълум қилган. Муаммо шундаки, аҳолига замонавий тиббий хизмат кўрсатиш мақсадида Хитойдан олиб келинаётган 2 миллиард 400 миллион сўмлик замонавий тиббий жиҳозлар 5 ойдан буён божхона терминали омборхонасида номаълум сабабларга кўра ушлаб турилган. Бу мурожаат ҳам Халқ қабулхонаси аралашуви билан ижобий ҳал этилди ва тиббий жиҳозлар шифохонага келтириб ўрнатилди.

Халқ қабулхонамиз томонидан республика миқёсида биринчилардан бўлиб янгича жараёнларни амалиётга татбиқ этишимиз биз кутгандан ҳам зиёд самара бера бошлади. Яъни, Андижон вилоятидаги барча ташкилот, муассаса раҳбарлари билан келишилган ҳолда туманнинг энг чекка ва олис ҳудудларида оммавий сайёр қабулларини ўтказа бошладик.

Бевосита аҳоли истиқомат қилаётган маҳаллаларнинг ўзида сектор раҳбарлари билан ҳамкорликда қабулларни жорий этдик. Натижада ўнлаб мурожаат қабул қилиниб, барча сўровлар юзасидан ижобий ечимга эришдик. Минглаб ҳамюртларимиз ўзларининг узоқ йиллар давомида ечимини кутиб турган муаммолари ҳал бўлганидан хурсанд бўлганини кўриш хизматимизга берилган муносиб баҳодир.

Бир сўз билан айтганда, Халқ қабулхонаси институти халқ билан мулоқотнинг ўзига хос, ноёб тизими сифатида жамиятдаги муаммоларни бартараф этишга, одамларнинг ўз ҳаётидан рози бўлиб яшашини таъминлашга яқиндан ёрдам бермоқда.

Ойбек МEЛИБОЕВ,

Ўзбекистон Республикаси Президентининг Андижон вилояти Избоскан туманидаги Халқ қабулхонаси мудири