Фото: Global Look Press

Украина можаросини ҳал қилиш учун дипломатик воситалар барбод бўлган. Бу ҳақда Германия канцлери Фридрих Мерц Бундестагдаги чиқишида айтиб ўтди.

Шу ўринда сиёсатчи Украина расмийларининг «Россия агрессияси»га қарши курашини қўллаб-қувватлашда давом этишга ваъда берди.

Бунгача британиялик дипломат Ян Проуд Ғарбнинг Россияга нисбатан санкцияларини юмшатиш Украинадаги можаронинг тезроқ ҳал этилиши учун туртки бўлиши мумкин, деган фикрни илгари сўрган эди. Унинг сўзларига кўра, Россияга қўйилган чекловлар унинг иқтисодий моделининг фундаментал тамойилларини ўзгартира олмади.

Шу йилнинг 7 июль куни АҚШ президенти Дональд Трамп Исроил бош вазири Бенямин Нетаньяҳу билан қўшма матбуот анжумани чоғида Россия президенти Владимир Путин билан 3 июль куни бўлиб ўтган телефон мулоқоти натижаларидан ҳафсаласи пир бўлганини айтди. Унинг сўзларига кўра, у ҳамкасбини Украинадаги можарони тўхтатишга ишонтиришга умид қилган, бироқ бу борада ҳеч қандай муваффақиятга эришиб бўлмаган.

Олдинроқ, «The Wall Street Journal» АҚШ президенти Дональд Трамп Украинага қўшимча «Patriot» ҳаво мудофаа тизимини юбориш имкониятини кўриб чиқаётгани ҳақида хабар берганди.

«Президент Трамп Украинага қўшимча «Patriot» ҳаво мудофаа тизимини жўнатиш масаласини кўриб чиқмоқда. Оқ уй Пентагондан Украинага қўшимча қуроллар, жумладан, «Patriot» юбориш вариантлари ҳақида сўради. Расмийлар, шунингдек, бошқа давлатлар Киевга қўшимча «Patriot»лар етказиб бера оладими ёки йўқлигини кўриб чиқмоқда», — дейилади нашр хабарида.

Пентагоннинг собиқ расмийсига кўра, аввалроқ АҚШ ва Германия Украинага учта ана шундай тизимни, Европа Иттифоқи эса яна биттасини ўтказган. Аммо ҳозирда барча етти тизим техник хизмат кўрсатиш билан боғлиқ муаммолар туфайли бир вақтнинг ўзида ишлай олмайди.