Сирдарё вилояти мусиқали драма театрида “Турон” мактаб театри республика танловининг вилоят босқичи ўтказилди.

Умумий ўрта таълим мактаблари ўқувчиларининг ижодий ва интеллектуал қобилиятларини ривожлантириш ҳамда ватанпарварлик руҳида тарбиялаш, иқтидорли ўқувчиларни аниқлаш, уларнинг истеъдодларини намойиш этишларига кенг имкониятлар яратиш мақсадида ўтказиб келинаётган мазкур танловнинг туман ва шаҳар босқичлари ҳам юқори савияда ташкил этилди.

- “Турон” мактаб театри республика танловининг туман ва шаҳар босқичларида 302 та мактабнинг театр студиялари қатнашди,-дейди Сирдарё вилояти “Келажак маркази” директори ўринбосари Наргиза Холмуротова. — Эътиборлиси мазкур босқичларда 2416 нафар ўқувчи қатнашиб, ўз ижодий қобилиятларини синовдан ўтказди. Эътироф этиш керакки, айни танлов орқали кўплаб истеъдодли ёшлар аниқланмоқда. Қолаверса, у ўқувчиларнинг ижодий қобилиятини ривожлантириш учун маҳорат мактаби бўлиб ҳам хизмат қилмоқда. Шу ўринда кейинги йилларда мактаб театр студияларини ривожлантиришга катта эътибор берилаётганлигини таъкидлаш ўринлидир. Хусусан, студияларда профессионал театр актёрлари билан учрашувлар ва уларнинг маҳорат дарслари ташкил қилинаётир.

Танловнинг вилоят босқичи якунига кўра Боёвут туманидаги 41-умумий ўрта таълим мактабининг “Буюк Турон авлодлари” гуруҳи биринчи ўринни эгаллади ва республика босқичида иштирок этиш ҳуқуқини қўлга киритди.

Маълумот учун: “Турон” мактаб театри республика танловининг республика босқичида 1-ўринни қўлга киритган жамоага хорижий давлатга таълимий саёҳат йўлланмаси берилиши кўзда тутилган.

Аҳмадали ШЕРНАЗАРОВ, “Халқ сўзи”.