Фото: Reuters

Туркиянинг аксарият ҳудудларида дам олиш кунлари комендантлик соати яна қайта тикланади. 

Бу ҳақда Туркия президенти Режеп Таййип Эрдоған айтиб ўтди дея хабар бермоқда "Anadolu" ахборот агентлиги.

«Коронавирус туфайли ўлимлар сонининг кўпайиши бизни хавфсизлик чораларини қайта кўриб чиқишга мажбур қилди. Мамлакатимиз аҳолисининг 80 фоизи яшайдиган 58 вилоят яна хавфли ҳудудга айланди. Шу боис уларда шанба ва якшанба кунлари комендантлик соати қайта тикланди», дейди президент.

Бундан ташқари, мамлакатда иш кунлари соат 21.00 дан 5.00 гача бўлган комендантлик соати сақланиб қолади.

Эрдоғаннинг айтишича, комендантлик соати пайтида кафе ва ресторанлар фақат таомларни ўзлари билан олиб кетувчилар учун хизмат кўрсатади. Қолган вақт давомида бинонинг умумий ҳажмидан 50 фоизидан кўп бўлмаган миқдорда ташриф буюрувчиларни қабул қилиши лозим.

Аввалроқ, Туркия президенти мамлакат аҳолиси жорий йилнинг июнь ойида коронавирусга қарши эмлаб бўлинишини айтиб ўтган эди.

Шунингдек, давлат раҳбари эпидемиологик вазиятга қараб мамлакат ҳудудлари тўрт тоифага бўлинишини ва комендантлик соати бекор қилинишида ҳар бир вилоят учун алоҳида қарорлар қабул қилинишини таъкидлаган.