Қўшма Штатлар Эронга қарши урушда ўз олдига қўйган мақсадларига эришишга яқин ва ҳарбий кампанияни «якунлашни» кўриб чиқмоқда, деб хабар берди Дональд Трамп ўзининг Truth Social ижтимоий тармоғида.

Трампнинг сўзларига кўра, ҳарбий операциянинг мақсадлари сирасига Эроннинг ракета салоҳияти ва мудофаа-саноат базасини тўлиқ йўқ қилиш, шунингдек, Эрон ҳарбий-денгиз ва ҳарбий-ҳаво кучларини, жумладан, ҳаво ҳужумидан мудофаа воситаларини тугатиш киради.

Бундан ташқари, Трамп Эроннинг ҳеч қачон ядровий қуролга эга бўлишга яқинлашмаслигини таъминлаш зарурлигини таъкидлади. АҚШ Президентининг сўзларига кўра, Эронга қарши урушнинг яна бир мақсади «бизнинг Яқин Шарқдаги иттифоқчиларимизни, жумладан Исроил, Саудия Арабистони, Қатар, БАА ва бошқаларни энг юқори даражада ҳимоя қилиш» ҳисобланади.

Трамп, шунингдек, Ҳўрмуз бўғозидаги хавфсизликни ундан фойдаланувчи давлатларнинг ўзлари таъминлаши кераклигини қўшимча қилди. «Биз бу давлатларга ёрдам берамиз, — деб ёзди у, — аммо Эрон томонидан келаётган таҳдид бартараф этилиши билан бунга эҳтиёж қолмаслиги керак».

АҚШ ва Исроил 28 февралдан бери Эронга зарбалар бермоқда. Эрон бунга жавобан АҚШнинг Форс кўрфазидаги иттифоқчи давлатларига ҳужум қилиб, жумладан, ёнилғи-энергетика инфратузилмаларига зарбалар бермоқда. Уруш туфайли жаҳон нефть етказиб бериш ҳажмининг чорак қисми ўтадиган Ҳўрмуз бўғозида кемалар ҳаракати тўхтатилган. Дунё бўйича нефть ва газ нархлари кескин кўтарилиб кетди.

Яқин орада АҚШ Яқин Шарқдаги уруш учун янги кучларни сафарбар этиши кутилмоқда. Axios нашрининг маълумотларига кўра, АҚШ Президенти маъмурияти Эроннинг Форс кўрфазидаги Харг оролини босиб олиш ёки денгиз блокадасига олиш режасини ишлаб чиқмоқда.