Кеча Тожикистон демократик партиясининг навбатдан ташқари қурултойи бўлиб ўтди. Унда партия ўз етакчиси Саиджаъфар Усмонзодани республика президентлигига номзод сифатида илгари сурди. Бу ҳақда Asia-Plus хабар берди.

С.Усмонзода 2013 йилги сайловда ҳам иштирок этиб, 1,02 фоиз овоз тўплаган эди.

У 2015 ва 2020 йилги парламент сайловларида эса парламент депутати этиб сайланган.

Шундай қилиб Тожикистондаги 7 та сиёсий партиянинг 3 таси президентлик учун ўз номзодларини кўрсатиб бўлди — аграр партиядан Рустам Латифзода, социалистлар партиясидан Абдуҳалим Ғаффоров ва демократлардан Саиджаъфар Усмонзода.

Тожикистон коммунистлар партияси ва халқ партияси ўз номзодларини сентябрь ойи бошида илгари суришлари кутиляпти.

Мухолифатдаги социал-демократлар партияси эса ҳали ўз съезди муддатини маълум қилмади. Унинг раиси Раҳматилло Зойиров яқинда партиянинг шаҳар ва туманлардаги ячейкалари социал-демократлар президент сайловида қатнашишига қарши чиқаётганини айтиб ўтган.

Эслатиб ўтамиз, Тожикистонда президент сайлови 2020 йил 11 октябрь ташкил этилади.