Фото: Халқ сўзи

Шиддат билан ривожланиб бораётган бугунги даврда иқтисодиётимизнинг муҳим йўналиши бўлган электротехника саноатида истиқболли лойиҳалар ҳаётга татбиқ этилмоқда. Хусусан, Самарқанд вилоятида 2022 йилда мазкур йўналишда қиймати 459 миллиард сўмдан ортиқ 16 та лойиҳа ишга туширилди ва мингга яқин иш ўринлари яратилди. Бунинг эвазига электротехника маҳсулотлари тури ҳамда экспорт географияси ортди.

Самарқанд шаҳридаги «Элхолдинг» илмий-ишлаб чиқариш бирлашмаси вилоятдаги йирик ишлаб чиқариш қувватлардан бири саналади. Замонавий электродвигателли юк мототцикллари, қишлоқ хўжалиги техникалари ҳамда импорт ўрнини босувчи инновацион ўқув-лаборатория жиҳозлари ишлаб чиқарувчи корхона ўтган йили қарийб 2 миллион АҚШ доллари миқдоридаги маҳсулотларни ўнга яқин давлатларга экспорт қилди. Жорий йилда эса корхонада 115 миллиард сўмлик маҳсулотлар ишлаб чиқариш мақсад қилинган.

2022 йилда корхона цехларини техник модернизация қилиш маҳсулот ишлаб чиқариш тури ва ҳажмини ошириш имконини берди. Масалан, шу вақтга қадар корхонада уч турдаги электродвигателли юк мототцикллари ҳамда автомобиль тиркамалари ишлаб чиқарилаётган бўлса, янги ишлаб чиқариш линияларининг ишга тушиши билан электродвигателли юк мототцикллари тури 6 та етди.

— Жорий йилда 300 та ана шундай юк мототцикллари ишлаб чиқармоқчимиз, — дейди корхона бош муҳандиси Жамшид Пардаев. — Булар бир марталик қувват билан 60-70 километр йўл босади. 600 килограмгача юк кўтара олади. Бу йил электродвигателли юк мототциклларини 50-55 фоизгача маҳаллийлаштириш режамиз бор.

Корхонада олиб борилаётган иқтисодий лойиҳаларга кўра, модернизация қилиш ишлари ҳозирда ҳам жадал олиб борилмоқда. Энерготежамкор, замонавий ускуналар ёрдамида бугунги кунда 0,5 миллиметрдан 70 миллиметргача бўлган қалинликдаги металларни кесиш, уларга турли шакллар бериш жараёнлари амалга ошириляпти. Яқин кунларда корхонада порошокли бўёқлаш цехи ҳам ишга туширилади.

— Биз шу пайтгача пресформа штампларни Туркия ва Хитойдан олиб келар эдик, — дея давом этади Ж. Пардаев. — Мазкур цехни февраль ойи охирида ишга тушириш мўлжалланяпти.

Дарвоқе, корхонада универсал экиш сеялкалари, культиваторлар ҳам ишлаб чиқарилмоқда. Бундан ташқари кооперация асосида Самарқанд вилоятида жойлашган автомобиль корхоналари учун бутловчи деталлар, эҳтиёт қисмлар тайёрланиб, етказиб бериляпти.

Албатта, бу вилоятдаги корхоналар ўртасидаги ҳамкорликни янада ривожлантириш билан бирга маҳаллийлаштириш даражасини оширишга хизмат қилмоқда.

Абдулазиз Йўлдошев, «Халқ сўзи».