Қурилиш вазирлиги бош мутахассиси 1500 доллар пора билан ушланди
Фото: ДХХ
Қурилиш ва уй-жой коммунал хўжалиги вазирлиги бош мутахассиси 1,5 минг доллар пора олаётганида қўлга тушди. Бу ҳақда Давлат хавфсизлик хизмати хабар бермоқда.
Маълум қилинишича, мазкур мансабдор шахснинг коррупцион ҳаракати ДХХнинг Тошкент шаҳар бўйича бошқармаси ҳамда ИИББ ходимлари ҳамкорлигида ўтказилган тезкор тадбирда фош этилди. У Тошкент шаҳридаги кўп қаватли уйларга хизмат кўрсатувчи МЧЖ раҳбарининг ишончига кириб, ундан 1,5 минг доллар олган вақтида ушланган.
Қўлга олиш жараёнида вазирлик ходими қочишга уринган, бироқ тезкор ходимлар томонидан ушлаб қолинган.
Аниқланишича, бош мутахассис Юнусобод туманидаги 6 та уйга хизмат кўрсатишни бир МЧЖдан иккинчи МЧЖга ўтказиш ҳақидаги уй-жой мулкдорлари имзолаган далолатномаларни биллинг тизимининг «Менинг уйим» платформасидан рўйхатдан ўтказиб бериш эвазига 2,2 минг доллар талаб қилган ва бу ишларни ўзининг мансабдор танишлари орқали ҳал қилиб беришни режалаштирган.
Қайд этилишича, ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг