Фото: NUR.KZ

Қозоғистон президенти Қосим-Жомарт Тоқаев мамлакатда кузатилаётган норозилик намойишлари фонида 5—19 январь кунлари республика пойтахтида фавқулодда ҳолат жорий қилди.

Таъкидланишича, Нур-Султонда фавқулодда ҳолат режими жамоат хавфсизлигини таъминлаш, шунингдек, фуқароларнинг ҳуқуқ ва эркинликларини ҳимоя қилиш мақсадида жорий этилган. Шу муносабат билан шаҳарда соат 23:00 дан 07:00 гача комендантлик соати амал бўлади.

Эслатиб ўтамиз, аввалроқ Қозоғистондаги норозилик намойишлари муносабати билан Олмаота ва Манғистау вилоятларида фавқулодда ҳолат жорий этилган эди.

Қозоғистонда 2 январь, якшанба куни автомобиллар учун газ нархи литри учун 60 тангадан 120 тенгега ошиши муносабати билан норозилик намойишлари бошланди. Намойишчилар республиканинг биринчи президенти Нурсултон Назарбоевдан сиёсатни тарк этишни талаб қилишди. 

4 январь куни намойишчилар ва хавфсизлик кучлари ўртасида тўқнашувлар бошланди. Мамлакатнинг бошқа шаҳарларида ҳам тартибсизликлар бўлиб ўтди. Кейинроқ Тоқаев ҳукумат истеъфосини қабул қилди. 

5 январь куни Ақтўбеда оломон полиция ўрасини ёриб ўтиб, Акимат (ҳокимият) биносига бостириб кирди. Чимкент ва Таразда ҳам маъмурий биноларга ҳужумлар уюштирилган.