Фото: Абдулазиз Йўлдошев / Халқ сўзи

Очиғи, қулупнайни йилнинг апрель-май ойларида, сўнг августда тановул қилишга одатланганмиз. Чунки очиқ майдонда қулупнай етиштириш мавсуми шу ойларга тўғри келади. Лекин Қўшработда қиш остонада турган айни паллада ҳам бу мевани етиштираётган хонадонда бўлиб, ҳавас ва ҳайрат туйдик, очиғи.

Қўшработда туман номи билан аталувчи маҳалладаги 89-умумий ўрта таълим мактабида ўқитувчи бўлиб ишлайдиган Буврама Қодирова ишдан бўш вақтида томорқа деҳқончилиги билан шуғулланади. У 1 сотих ерда исмалоқ, 2 сотих майдонда қулупнай етиштириб, оиласига мўмайгина даромад келтиряпти.

- Талабалик давримда диалектология бўйича амалиёт ўташ учун Каттақўрғон туманига бориб, қулупнай етиштираётган томорқачиларга ҳавас қилганман, - дейди Б. Қодирова. - Уни ўзимизда ҳам етиштириб, кўпайтиришни режа қилгандим. Кўпчилик “Қўшработда қулупнай етиштириб бўлмайди”, дер эди.

Мақсад қатъий бўлса, уддаласа бўларкан. Тўрт йилдан бери қулупнай етиштириш билан шуғулланяпман. Биринчи йил 50 минг сўмга 200 туп кўчат келтириб, озгина жойга экдим. Кейин секин-аста кўпайтириб, шу йил 2 сотих ерда қулупнай етиштирдим. Баҳордан шу пайтга қадар 500 килограммдан кўпроқ ҳосил олиб, бозорда сотдим. 10 миллион сўм даромад қилдим. Ҳаво салқин бўлишига қарамай, шу пайтгача қулупнай пишишда давом этяпти. Ҳар куни мактабдан келиб, томорқада оилавий меҳнат қиламиз. Ҳовлимиз қирликда жойлашган бўлса ҳам, яхши ҳосил оламиз.

Келгусида режаларимиз катта. Туман ҳокимлигига мурожаат қилдик. Агар текисроқ ердан 2 гектар ер майдони ажратилса, қулупнайнинг янги навларидан келтириб, экамиз. Шунингдек, мураббо цехи ҳам ташкил этишни ният қилганмиз.

  Абдулазиз Йўлдошев, “Халқ сўзи”.