Фото: “Халқ сўзи”

Бухоро вилояти Қоракўл туманидаги “Megacluster” масъулияти чекланган жамияти махсус бинода донни намланган ҳолда гидропоника усулида “яшил озуқа” етиштиришни йўлга қўйди.

Тажриба ўзини тамоман оқлади. Бу ерда бир килограмм буғдойдан етти килограммгача “яшил озуқа” тайёрланмоқда. Атиги етти кунни талаб қиладиган бу усул шарофати билан ўнлаб гектар экин майдонини, сувни тежаб қолиш мумкин бўляпти. Гап шундаки, гидропоникада экиннинг илдиз қисмига сув берилса, кифоя. Олий таълим, фан ва инновациялар вазирлиги ҳамда Инновацион ривожланиш агентлиги томонидан қўллаб – қувватланган бу лойиҳани амалга оширилишининг яна бир афзал жиҳати шундаки, маҳсулот таннархи арзонлашяпти, тўйимли озуқанинг чорва молларида ҳазм бўлиш даражаси 90 – 95 фоизни ташкил этмоқда.Бошқача айтганда, озуқа нишхўрдга чиқмаяпти.

Мазкур корхонада маҳаллий шарт – шароитдан келиб чиққан ҳолда чорва озуқасини гранула кўринишида тайёрлаш йўлга қўйилган. Конвейердан кунига уч тоннагача шундай маҳсулот чиқмоқда. Унинг таркибида дағал хашак, беда, янтоқ, кунжара, чигит шроти, дон қўшимчалари мавжуд. Гранула ташишга қулай, экологик тоза, хушхўр, тўйимли. Умуман олганда эса экин майдонлари етишмовчилиги масаласини ҳал этишда гидропоника усулида чорва озуқаси тайёрлаш жуда қўл келади.

Айтмоқчи, вилоят ҳокими Ботир Зарипов куни кеча мазкур корхонада бўлиб, инновацион лойиҳа билан яқиндан танишди. Келгусида бу тажрибани оммалаштириш юзасидан фикрлашиб олинди.

Истам ИБРОҲИМОВ, “Халқ сўзи”.