Сўнгги кунларда мамлакатимизда коронавирус инфекцияси билан касалланиш ҳолатлари ортиб бораётганлигини инобатга олиб, Соғлиқни сақлаш вазирлигининг таклифига биноан, бугунги кунга қадар Республика махсус комиссиясининг қарорлари билан жорий этилган тартиб ва чекловларга қўшимчалар киритилди: Унга кўра, жорий йилнинг 28 июнидан 12 июлига қадар Тошкент шаҳрига қўшни вилоятлардан автотранспорт (автобус, автомобиль) воситалари орқали ўта зарурат бўлмаган ҳолларда кириш бўйича чекловлар ўрнатилди.
Ўтган бир ҳафта мобайнида Республикамизнинг барча ҳудудларидан “O‘ztemiryo‘lyo‘lovchi” акциядорлик жамиятига қилинган юзлаб телефон қўнғироқларининг аксариятида “поездда Тошкент шаҳрига кириш-чиқишда чеклов ўрнатилганми?” деган савол билан мурожаат бўлган.

Шуни алоҳида таъкидлаш жоизки, темир йўл вокзалларига киришда доимий равишда карантин талабларига, санитария гигиена қоидаларига қатъий риоя қилган ҳолда, йўловчиларнинг тана ҳарорати ўлчаниб, тиббий ниқоб ва қўлқоплар берилмоқда.
 Бундан ташқари, поездлар рейсга чиқишдан олдин ҳамда манзилга етиб боргач, йўловчилар вагондан тушганларидан сўнг санитария эпидемиология маркази ходимлари томонидан вагонларда дизенфекция ишлари амалга оширилади. Шу боис поездларда Тошкент шаҳрига кириш-чиқишда ҳеч қандай чекловлар ўрнатилмаган.
Йўловчилар чипталарни “Ўзбекистон темир йўллари” акциядорлик жамияти веб-сайти орқали е-ticket.railway.uz дан электрон тарзда ҳам харид қилишлари мумкин.

Изоҳ: Қўшимча маълумотларни Тошкент шаҳрида 1005 қисқа телефон рақами, жойлардаги темир йўл кассалари ҳамда маълумотлар бюросидан билиб олишингиз мумкин.
                                                                                   

“O‘ztemiryo‘lyo‘lovchi” AЖ