«Наманган» эркин иқтисодий зонаси 2026 йил учун дунёдаги нуфузли халқаро тузилмалардан бири — Жаҳон эркин зоналар ташкилоти (World Free Zones Organization)нинг овоз бериш ҳуқуқига эга аъзоси сифатида қабул қилинди.

Мамлакатимизда инвестицияларни жалб қилиш, экспортни ошириш ва замонавий ишлаб чиқаришларни ривожлантириш мақсадида ташкил этилган махсус иқтисодий ҳудудлардан бири ҳисобланадиган «Наманган» ЭИЗ вилоятнинг инвестицион жозибадорлигини ошириш, халқаро иқтисодий алоқаларни кенгайтиришда муҳим роль ўйнамоқда.

Бу ерда чет эл инвестицияларини жалб қилиш, экспортга йўналтирилган ишлаб чиқаришларни ривожлантириш, замонавий технологияларни жорий этиш, янги иш ўринларини яратиш, маҳаллий хом ашёни қайта ишлаш каби йўналишларда йирик лойиҳалар амалга оширилмоқда. Хусусан, тўқимачилик ва тайёр кийим-кечак, озиқ-овқат, қурилиш материаллари, электротехника ва маиший техника, фармацевтика, металлургия саноатлари эркин иқтисодий зонасида яратилган қулай шарт-шароит, кенг имкониятлар асосида жадал ривожланмоқда.

Фарғона водийсидаги катта истеъмол бозори, арзон ва малакали ишчи кучи, Марказий Осиё бозорларига яқинлик, давлат томонидан қўллаб-қувватлаш каби афзалликлар бу борада катта аҳамият касб этмоқда.

Мазкур ташкилот томонидан Наманган эркин иқтисодий зонасига аъзолик сертификати тақдим этилди. Унга кўра, зона 2026 календарь йили учун расман ташкилотнинг тўлақонли иштирокчиси сифатида эътироф этилди. Жаҳон эркин зоналар ташкилотига аъзолик «Наманган» эркин иқтисодий зонасининг, халқаро инвесторлар билан ҳамкорликни янада кучайтириш, илғор тажрибаларни ўрганиш ва жорий этиш, экспорт салоҳиятини ошириш, глобал иқтисодий тармоқларда фаол иштирок этиш имкониятларини кенгайтиради.

Бу эса ўз навбатида, вилоятда янги инвестиция лойиҳаларини амалга ошириш, иш ўринлари яратиш ва ҳудуд иқтисодиётини янада ривожлантиришга хизмат қилади.

Акрамжон Сатторов, «Халқ сўзи».