Ҳукумат қарори (431-сон, 12.07.2025 й.) билан «Лифтларни техник кўрикдан ўтказиш тартиби тўғрисида»ги низом тасдиқланди. Бу ҳақида «Ҳуқуқий ахборот» Telegram-канали маълум қилди.

Унда айтилишича, бино ва иншоотларда ўрнатилган, доимий равишда фойдаланишда бўлган лифтлар 12 ойдан ошмаган ҳолда камида 1 марта мажбурий даврий техник кўрикдан ўтказилади.

Шунингдек, фойдаланишга топширилган ва янги ўрнатилган ҳар қандай лифт махсус электрон ахборот тизимида рўйхатга олинишидан аввал дастлабки техник кўрикдан ўтказилиши шарт.

Дастлабки техник кўрик лифт пудратчисининг мурожаатига биноан 10 иш кунидан кечиктирмай ихтисослашган ташкилот томонидан амалга оширилиши белгиланган.

Бундан ташқари, техник кўрик натижаларининг тоифасига қараб фойдаланишга яроқли лифтга «яшил», қисман носоз лифтга «мовий», носоз лифтга «сариқ» ҳамда фойдаланиш учун хавфли лифтга «қизил» рангларда маълумот ёрлиғи ёпиштирилади.

«Техник кўрик натижасида фойдаланиш учун хавфли ва қизил рангли маълумот ёрлиғи билан белгиланган лифтдан фойдаланиш тақиқланиши лозим», — дейилади хабарда.