Тадбирда Кувайтдаги «Expo 965 Team for Heritage & Crafts» гуруҳига кирувчи маҳаллий ҳунармандлар билан бир қаторда мамлакатдаги дипломатия ваколатхоналари ҳам ўз кўргазмалари билан иштирок этди.

Кувайтликлар Ўзбекистон элчихонаси томонидан ташкил этилган кўргазмада мамлакатимиздаги ҳунармандчилик ва каштачилик намуналари ҳамда республикамизнинг тарихий меъморий ёдгорликлари ҳақида ҳикоя қилувчи альбом ва буклетлар билан танишдилар. Тадбир иштирокчилари миллий таомлардан татиб кўришга ҳам таклиф этилди.

Ўзбекистон стенди билан танишган Кувайтдаги расмий доиралар вакиллари, соҳа мутахассислари кўп асрлик тарихий меросга эга мамлакатимиз халқининг амалий санъати нафис ва бетакрорлиги билан дунёга машҳурлигини таъкидладилар.

Кувайт санъат коллежи профессори, Бутунжаҳон Ҳунармандлар кенгаши аъзоси Али ал-Нажада мамлакатимизга сафари чоғида ўзбек амалий безак санъатининг кўлами жуда кенглигига шоҳид бўлгани, уларининг ўзига хос яратиш технологияларини катта қизиқиш билан ўрганганини сўзлаб берди.

Кувайтлик ҳунарманд, шунингдек, Ўзбекистон раҳбарияти томонидан маҳаллий ҳунармандлар ҳар томонлама қўллаб-қувватланаётгани, ўзбек халқининг миллий қадриятларини сақлаш, унинг қадимий анъаналарини тиклаш борасида республикада амалга оширилаётган ишларни юқори баҳолади.

Кувайтдаги «CompassKw» сайёҳлик компанияси Бош директори Жосим Аббос Ўзбекистон стендида намойиш этилган миллий санъат асарларидан намуналар ҳамда қадимий Самарқанд, Бухоро, Хива шаҳарларидаги меъморий ёдгорликлар кўплаб тадбир иштирокчиларини юртимизга чорлаганини айтди. У, шунингдек, компания хизматларидан фойдаланувчи кувайтликлар ўртасида Ўзбекистон сайёҳлик салоҳиятини тарғиб этиш бўйича ишлар янада жадаллаштирилишини ҳам маълум қилди.

Ярмарка иштирокчиларига Кувайт-Тошкент, Кувайт-Наманган, Кувайт-Самарқанд йўналишларида тўғридан-тўғри авиақатновлар йўлга қўйилгани, кувайтликлар учун 10 кунлик визасиз режими жорий этилгани икки давлат ўртасида туризм соҳасини ривожлантириш нуқтаи назаридан катта имкониятларни очиб бергани маълум қилинди.