16 март куни Кубада электр энергияси таъминоти бутунлай узилди. Бу ҳақда маҳаллий ҳукумат маълумотларига таяниб Associated Press хабар бермоқда.

Кубанинг Unión Eléctrica давлат компанияси тизимни қайта тиклаш жараёни бошланганини маълум қилди. Компания вакилларининг таъкидлашича, тизим ўчган вақтда иш фаолиятида бўлган иссиқлик электр станцияларида ҳеч қандай носозликлар кузатилмаган.

Мамлакат Энергетика ва кончилик саноати вазирлиги содир бўлган ҳодиса юзасидан суриштирув ишлари бошланганини маълум қилди.

Ушбу блэкаут Кубадаги энергетика ва иқтисодий инқирознинг чуқурлашиши фонида юз берди. Мамлакат президенти Мигель Диас-Канель 13 март куни Куба уч ойдан бери нефть олмаганини, ҳозирда тизим қуёш энергияси, табиий газ ва иссиқлик электр станциялари ҳисобига ишлаётганини таъкидлаган эди.

Бундан бир ҳафта олдин Кубанинг ғарбий қисмида йирик электр узилиши содир бўлиб, миллионлаб одамларни чироқсиз қолдирган эди.

Илгари Куба нефтни Венесуэладан олар эди, бироқ жорий йилнинг январь ойи бошида АҚШ томонидан Венесуэла етакчиси Николас Мадуро қўлга олингач, етказиб бериш тўхтаб қолган.

Президент Диас-Канель Куба ҳукумати икки давлат ўртасидаги келишмовчиликларни мулоқот йўли билан ҳал қилиш учун АҚШ маъмурияти билан музокаралар олиб бораётганини маълум қилди.

Маълумот учун, Куба аҳолиси тахминан 11 миллион кишини ташкил этади.