Сўнгги кунларда Буюк Британияда коронавируснинг мутацияга учрагани ва жуда тез тарқалаётгани хабарлар тарқалмоқда. Хўш, коронавируснинг янги штамми қанчалик хавфли?

Ушбу саволларга Москва давлат университети профессори, биология фанлари доктори Алексей Аграновский қуйидагича жавоб берди.

«Ушбу мутациянинг пайдо бўлиши яна бир бор мамлакатлар ўртасидаги чегараларни ёпиш масаласини муҳокамага қўйишга мажбур қилади», дейди профессор.

Мутахассиснинг таъкидлашича, янги штаммнинг ўзагида ўзгариш йўқ бу эса мавжуд вакциналарнинг унга қарши самарали бўлишини англатади.

Аввалроқ, Европанинг айрим мамлакатлари коронавируснинг янги тури хавфи туфайли Буюк Британия билан парвозларни тўхтатишни маълум қилди. Хусусан, Нидерландия, Дания, Норвегия, Бельгия, Италия, Австрия, Германия, Португалия, Болгария, Литва, Латвия, Эстония, Франция, Туркия, Гонконг, Канада, Саудия Арабистони, Исроил, Сальвадор, Кувайт, Чехия, Хорватия, Швейцария, Марокаш, Ҳиндистон, Полша, Финляндия, Аргентина ва Россия ушбу мамлакат билан парвозларни тўхтатди.

14 декабрь куни Буюк Британия Соғлиқни сақлаш вазирлиги раҳбари Мэтт Хэнкок инглиз олимлари маълум штаммларга қараганда тез тарқаладиган коронавируснинг мутацияга учраган турини аниқлашганини маълум қилган эди.

Буюк Британия бош вазири Борис Жонсон ушбу мутация вируснинг бошқа турларига қараганда 70 фоиз тез тарқалишини айтиб ўтди.

Кучли эпидемиологик вазият боис 20 декабрдан Буюк Британиянинг жануби-шарқида ва Лондонда максимал тўртинчи даражадаги чекловлар жорий этилди.