Фото: Архив сурат

Бу ҳақда АОКАда ўтказилган брифингда мазкур акциядорлик жамияти ахборот хизмати раҳбари Муҳаммаджон Бекмуҳаммедов маълум қилди.

«Иссиқлик электр станциялари» АЖ мамлакатимизда электр ва иссиқлик энергияси ишлаб чиқарувчи асосий генерация тизими ҳисобланади. Юртимизда жами ишлаб чиқарилаётган электр энергиясининг 80 фоизи корхона зиммасига тўғри келади.

Жамият олдида турган устувор вазифалардан бири инвестиция лойиҳалари асосида янги ишлаб чиқариш қувватларини жорий этиш, мавжуд генерация манбаларини модернизация қилиш ҳисобланади.

Агар, 2016 йилга қадар тизимда янги жорий этилган замонавий энергоблокларнинг жами қуввати 505 МВтни (жами ишлаб чиқариш қувватларининг 5 фоизи) ташкил этган бўлса, сўнгги йиллар давомида амалга оширилган инвестиция лойиҳалари натижасида қўшимча 3504 МВт янги қувватлар ишга туширилиб, 1800 МВт мавжуд энергоблоклар модернизация қилинди. Натижада энерготежамкор, энг замонавий-энергосамарадор ускуналарнинг умумий қуввати 5304 МВтга етди ва иссиқлик электр станциялари амалдаги қувватларининг 50 фоизини ташкил қилмоқда.

Ўтган олти йил давомида ушбу лойиҳаларни амалга ошириш учун жами 4,6 млрд. АҚШ доллари сарфланган бўлса, шулардан жалб этилган ташқи инвестициялар 2,1 млрд. АҚШ долларини ташкил этади.

Инвестиция дастурига асосан ўтган 2022 йилда 6 та инвестиция лойиҳаси доирасида 256,3 млн. АҚШ доллари ўзлаштирилиб, белгиланган йиллик режа 111,9 фоизни ташкил этди.

Бугун инвестиция лойиҳалари доирасида Тошкент ИЭМда ҳар бирининг қуввати 32 МВтга тенг бўлган иккита газ турбина қурилмасини қуриш ва Толимаржон ИЭСнинг қувватини камида 900 МВтга ошириш бўйича истиқболли лойиҳалар амалга оширилмоқда.

Шунга кўра, истеъмолчиларга барқарор энергия ресурсларини етказиб бериш, электр ва иссиқлик энергияси нархининг ошишига йўл қўймаслик мақсадида, ёқилғи сарфини камайтириш, операцион самарадорликни таъминлаш, янги юқори ривожланган ҳамда энергосамарадор технологияларни жорий этиш натижасида 2022 йилда ишлаб чиқарилган маҳсулот таннархи 1,36 трлн. сўмга пасайтирилди. Бунда белгиланган режа 118,3 фоизга бажарилди.

«Иссиқлик электр станциялари» АЖда инвестиция лойиҳаларини самарали амалга ошириш бўйича, бугунги кунда АҚШнинг «General Electric», Япониянинг «Mitsubishi Corporation», «Itochu», Жанубий Кореянинг «Hyundai», Испаниянинг “Intecsa Ingeniera Industrial S.A.», Италиянинг «AC Boilers S.p.A», Россиянинг «Силовые машины», «Красный котелщик», «Калужский турбинный завод», «Таганрогский котелостроителный завод», «Ленинградский металлический завод», Туркиянинг «Çalik Enerji» компаниялари ҳамда ЕТТБ, ОТБ, Япониянинг «JICA», Хитойнинг давлат тараққиёт банки билан самарали ҳамкорлик ишлари олиб борилмоқда.

Шунингдек, Жаҳонда «Катта учлик» гуруҳига кирувчи АҚШнинг “Fitch Ratings” рейтинг агентлиги «Иссиқлик электр станциялари» АЖнинг ҳалқаро индикатив рейтингини “BB-” «Барқарор» даражада баҳолади ва Ўзбекистон Республикасининг суверен рейтингига тенглаштирди. Мазкур рейтинг, «Иссиқлик электр станциялари» АЖни жаҳоннинг инвестиция бозорларида аниқ ва равшан бизнес стратегиясига, шаффоф молиявий ҳолатига ва кучли корпоратив бошқарув тизимига эга корхона сифатида танитади.

2023 йилда «Иссиқлик электр станциялари» АЖ томонидан жами 5 та инвестиция лойиҳаси доирасида жами 285,3 млн. АҚШ доллари ўзлаштирилиши режалаштирилган.

Шу билан бирга, йил охирига қадар ёқилғи сарфини камайтириш, операцион самарадорликни ошириш, янги энергосамарадор технологияларни жорий этиш натижасида маҳсулот таннархи 1,2 трлн. сўмга пасайтириш режалаштирилган.