Иордания Ҳошимийлар Подшоҳлиги парламенти делегацияси Ўзбекистонга келди
Бугун, 3 февраль куни Олий Мажлис Сенати Раиси Танзила Нарбаеванинг таклифига биноан Иордания Ҳошимийлар Подшоҳлиги парламенти Мажлиси ал-Аъян Раиси Файсал Акиф ал-Фаез бошчилигидаги делегация мамлакатимизга расмий ташриф билан келди.
Меҳмонларни Тошкент халқаро аэропортида Сенатнинг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси А. Агзамходжаев кутиб олди.
Ташриф доирасида Иордания делегацияси аъзолари «Янги Ўзбекистон» боғига ташриф буюриб, Мустақиллик монументига гулчамбар қўйиш маросимида иштирок этади.
Шунингдек, ташриф давомида Файсал Акиф ал-Фаез бошчилигидаги делегациянинг Олий Мажлис палаталари раҳбарлари билан учрашувлари ўтказилиши ва икки мамлакат ўртасидаги парламентлараро ҳамкорликни янада ривожлантириш масалалари муҳокама қилиниши кўзда тутилган.
Шу билан бирга, кўҳна Самарқанднинг тарихий ва меъморий обидаларига ташриф ҳам режалаштирилган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг