Индонезиянинг Ғарбий Калимантан провинциясида вертолёт ҳалокатга учраши оқибатида бортда бўлган саккиз киши ҳалок бўлди. Бу ҳақда Индонезия қутқарув хизмати раҳбари Муҳаммад Сяфий хабар берди.

Маълум қилинишича, 16 апрель куни эрталаб Мелави ҳудудидаги плантациядан учиб чиққанидан “Airbus H130” русумли вертолёт беш дақиқа ўтиб алоқадан узилган.

Муҳаммад Сяфийнинг сўзларига кўра, айни пайтда қутқарув гуруҳлари жасадлар ва вертолёт қолдиқларини топиш ишларини олиб бормоқда. Бироқ ҳалокат содир бўлган ҳудуд зич ўрмонлар ва тик тепаликлардан иборатлиги қутқарув ишларини қийинлаштирмоқда. Қутқарувчилар алоқа узилган жойдан тахминан 3 километр ғарбда вертолётнинг дум қисмига ўхшаш парчаларни топган.

Ҳалокат сабаблари ҳозирча номаълум. Маҳаллий қутқарув хизмати вакилининг маълум қилишича, бортда бўлган олти нафар йўловчи ва икки нафар экипаж аъзоси ҳалок бўлган.

Қутқарув ишларига ҳарбийлар ва полиция ходимлари жалб этилган бўлиб, улар жума куни ҳалокат жойига қуруқлик орқали етиб боришга ҳаракат қилмоқда. Маълум бўлишича, вертолёт Индонезиянинг “Citra Mahkota” компаниясига қарашли плантациядан учган ва у “Matthew Air Nusantara” компаниясига тегишли бўлган.