Фото: Экология вазирлиги

Экология вазирлиги тасарруфидаги «Чотқол» давлат биосфера қўриқхонасига туташ 32 859,89 гектар ҳамда «Оқтоғ-Томди» давлат қўриқхонасига туташ 28 500 гектар ҳудудда уларнинг қўриқланма зоналари белгиланди, деб хабар бермоқда вазирлик матбуот хизмати.

Билдирилишича, бу Ўзбекистон Республикаси Вазирлар Маҳкамасининг 2025 йил 5 мартдаги 142-сонли қарорида белгилаб қўйилган.

Қарорга кўра, Наманган вилоятидаги Поп ихтисослаштирилган ўрмон хўжалиги (766,53 гектар), Тошкент вилоятидаги Оҳангарон давлат ўрмон хўжалиги (8101,85 гектар), Тошкент вилояти Бўстонлиқ туманидаги Бурчмулла давлат ўрмон хўжалиги (23 991,51 гектар) ҳудудлари «Чотқол» давлат биосфера қўриқхонасининг қўриқланма зонасига киритилди.

«Оқтоғ-Томди» давлат қўриқхонасининг қўриқланма зонаси эса Навоий вилояти Томди туманидаги Томди давлат ўрмон хўжалиги (6200 гектар) ва Ветеринария ва чорвачиликни ривожлантириш қўмитаси (22 300 гектар) ҳудудидан иборат бўлди.

Таъкидланишича, бу қарор давлат қўриқхоналари ҳудудидаги табиий мажмуаларга хўжалик фаолияти салбий таъсирининг олдини олиш, ноёб ҳамда йўқолиб кетиш хавфи остида турган ўсимлик ва ҳайвонлар турларини сақлаб қолиш ҳамда кўпайтириш, биохилма-хилликни асрашга хизмат қилади.