Адлия вазирлигида Ҳуқуқий таъсир чораларини мутаносиблик принципига мувофиқлаштириш бўйича масъул давлат органлари ва ташкилотларининг ходимларидан иборат ишчи гуруҳ йиғилиши ўтказилди.

Янги таҳрирдаги Конституциянинг 20-моддасида давлат органлари томонидан инсонга нисбатан қўлланиладиган ҳуқуқий таъсир чоралари мутаносиблик принципига асосланиши ва қонунларда назарда тутилган мақсадларга эришиш учун етарли бўлиши кераклиги белгиланган.

Йиғилишда мазкур конституцион нормани ҳаётга тўлақонли татбиқ этиш мақсадида қонунчилик ҳужжатларида, шу жумладан, Жиноят, Маъмурий жавобгарлик тўғрисидаги ҳамда Солиқ кодексларида белгиланган ҳуқуқий таъсир чораларини таҳлил қилиш зарурлиги таъкидланди.

Шунингдек, инсоннинг ҳуқуқ ва эркинликлари фақат қонунга мувофиқ ва фақат конституциявий тузумни, аҳолининг соғлиғини, ижтимоий ахлоқни, бошқа шахсларнинг ҳуқуқ ва эркинликларини ҳимоя қилиш, жамоат хавфсизлигини ҳамда жамоат тартибини таъминлаш мақсадида зарур бўлган доирада чекланиши мумкинлигига алоҳида эътибор қаратиш лозимлиги қайд этилди.

Бундан ташқари, йиғилишда ҳар бир санкцияни мутаносиблик принципига мувофиқлаштириш масаласини кўриб чиқиш учун биринчи навбатда санкцияларни белгилашнинг асослари, эътибор қаратиш лозим бўлган жиҳатларини ёритиб берувчи услубий қўлланма ишлаб чиқиш масаласи муҳокама қилинди.

Услубий қўлланмани ишлаб чиқишда ривожланган давлатлар тажрибаси ҳамда ҳуқуқни қўллаш амалиёти чуқур таҳлил қилиниши зарурлиги профессор ўқитувчилар томонидан таъкидлаб ўтилди.

Йиғилиш якунида, ишчи гуруҳнинг ҳар бир аъзолари томонидан соҳа фаолиятига оид ҳуқуқий таъсир чораларини қўриб чиқиш ҳамда уларнинг мутаносиблик принципига мувофиқлигини таҳлил қилиш бўйича аниқ вазифалар белгилаб олинди.