Фото: www.google.com

Душанба куни Германияда дўконлар қайта очила бошланди. Аммо канцлер Ангела Меркел коронавируснинг янги тўлқини юзага келмаслиги учун аҳолини интизомли бўлишга чақирди.

Германиянинг 16 штати раҳбарларининг келишувига биноан 800 квадрат метргача ҳудудга эга бўлган дўконлар, шунингдек, автомобил ва велосипед сотадиган дўконларнинг очилишига рухсат берилди. Мактаблар икки ҳафтадан сўнг очилиши режалаштирилмоқда.

Федерал ва штатлар ҳукуматлари немисларга бозорларда ҳамда жамоат транспортида юз ниқобларини тақишни қатъий тавсия қилишди ва баъзи штатлар буни мажбурий қилиб қўйди.

Канцлер Ангела Меркел Германияда инфекция хавфи юқорилигича қолаётганини таъкидлаган. Унинг сўзларига кўра, карантиннинг юмшатилиши инфекциянинг тарқалишини оширадими ёки йўқ деган саволга 14 кундан кейин жавоб олса бўлади.

“Биз ҳушёр ва интизомли бўлишимиз керак. Чунки коронавируснинг иккинчи тўлқини ҳали қайтиши мумкин”, деб қўшимча қилди канцлер.

Айни пайтда Германия коронавирус билан касалланганлар сони бўйича АҚШ, Испания, Италия ва Франциядан кейин бешинчи ўринда турибди. Аммо анча эрта ва кенг қамровда ўтказилган текширувлар натижасида қурбонлар сони сезиларли даражада кам бўлишига эришилди.

Германияда коронавирусга чалинганлар сони 1785 тага ошди ва жами 143 457 тани ташкил қилди, дея хабар беради Роберт Кох Институти.

Манбага кўра, Германияда 24 соат ичида 194 нафар бемор коронавирусдан вафот этган, бир кун олдин эса бу кўрсаткич 110 киши эди. Вафот этганларнинг умумий сони 4598 киши.