Фото: Ҳасан Пайдоев / "Халқ сўзи"

Мамлакатимизда хотин-қизлар ва эркаклар учун тенг ҳуқуқ ҳамда имкониятларга эришиш, жамият ва давлат ишларини бошқаришда уларнинг тенг иштирокини таъминлаш, хотин-қизларни ижтимоий-ҳуқуқий жиҳатдан қўллаб-қувватлаш, шунингдек, уларни тазйиқ ва зўравонликдан ҳимоя қилишга қаратилган кенг кўламли ислоҳотлар амалга оширилмоқда.

Хотин-қизларга нисбатан камситишларнинг ҳар қандай кўринишига барҳам бериш, сиёсий, иқтисодий ва ижтимоий ҳаётда қарорлар қабул қилишнинг барча даражаларида аёлларнинг тўлиқ ва самарали иштирокини ва етакчилик тушунчалари ҳамда кўникмаларини ошириш мақсадида ёш йигит-қизлар ўртасида «Гендер тенглик етакчиси» жамоаси ташкил этилмоқда.

Жамоанинг мақсади – Ўзбекистонда юз бераётган гендер тенгликни таъминлаш, хотин-қизларни қўллаб-қувватлашга қаратилган ислоҳотларни фаоллаштириш, хотин-қизлар ва гендер тенглик масалаларида стратегик йўналишлар ва давлат дастурларидаги вазифалар ижросини сифатли таъминлаш, ўсмир ёшлар ҳаётига оид ўзгариш ва янгиланишларни кенг тарғиб этиш, хотин-қизларга нисбатан камситишларнинг ҳар қандай шаклига барҳам бериш, сиёсий, иқтисодий ва ижтимоий ҳаётда қарор қабул қилишнинг барча даражаларида аёлларнинг тўлиқ ва самарали иштироки, етакчилик қилиши учун тенг имконият даражалари яратилишини тушунтириш ҳамда ҳуқуқий онгини оширишдан иборат.

Ушбу жамоага Қорақалпоғистон Республикаси, вилоятлар ва Тошкент шаҳар олий ўқув юртларида таҳсил олаётган ҳамда жамиятимиз ривожига ҳисса қўшмоқчи бўлган фаол ёшлар орасидан гендер тенглик соҳаси бўйича аниқ билим ва кўникмага эга бўлган юксак маънавиятли, мустақил фикрловчи, чет тилларида мустақил гапира оладиган, ёши 18 дан юқори йигит-қизлар аъзо бўлиши мумкин.

Аъзолар орасидан раис ва унинг ўринбосарлари мезонлар асосида сайланади.

Танловнинг моҳияти ҳар бир ташкилотда гендер тенгликни таъминлашга қаратилган сиёсатни шакллантириш, фаолиятга гендер ёндашувларни жорий этиш, гендер тенгликка эришиш масалаларига жамоатчилик эътиборини кенг жалб қилиш, турли тузилмалар фаолиятига гендер тенгликни сингдириш, илғор тажрибаларни аниқлаш ва умумлаштириш ҳамда уларни кенг тарғиб этиш орқали жамиятда хотин-қизлар ва эркаклар тенг ҳуқуқ ва қонуний манфаатларини таъминлашдан иборат.

Танловнинг саралаш босқичлари 2022 йил 14 — 21 апрель кунлари ўтказилади. Номзодлар орасидан гендер тенглик сиёсатидан хабардор, креатив фикрлайдиган, хориж тилларини биладиган, лидерлик ва ташаббускорлик қобилияти юқори ёшлар танлаб олинади.

Жамоа таркибига кирган ёшлар халқаро экспертлар томонидан ўтказиладиган семинар-тренингларда иштирок этиш, ўзаро тажриба алмашиш ва ўқув кўникмаларни мустаҳкамлаш учун оромгоҳларга бориши, кутубхоналардан бепул фойдаланиш, Олий Мажлис Сенати томонидан ўтказиладиган тадбирлар, форум ва конференцияларда иштирок этиш имкониятига эга бўладилар.