Иллюстратив фото

Сўнгги вақтларда Америка Қўшма Штатларида жойлашган гигант технологик компаниялар Жанубий-Шарқий Осиё мамлакатларига катта қизиқиш билдирмоқда.

Жумладан, АҚШнинг «Microsoft» корпорацияси ўтган ҳафта Малайзия, Таиланд ва Индонезияга йўналтириладиган йирик сармояларини эълон қилганди. Жорий ҳафта бошида эса «Amazon» компанияси «Cloud» тизимини ривожлантириш учун Сингапурга 9 миллиард доллар инвестиция киритиш режасини очиқлади. Таъкидланишича, инвестициялар Сингапур корхоналарида ҳар йили 12 мингдан ортиқ ишчи ўринларини яратиши мумкин.

«Nvidia» компанияси бош директори Женсен Хуанг ўтган йилнинг декабрь ойида Малайзия, Вьетнам ва Сингапур бўйлаб ўз сафарини амалга оширган бўлса, «Apple» корпорация бош директори Тим Кук ўтган ой Сингапур, Вьетнам ва Индонезияга ташриф буюрди.

Душанба куни Малайзия Савдо ва сармоя вазирлиги «Google» корпорация яқин келажакда мамлакатга сармоя киритиш режаларини эълон қилишини айтди.

Глобал консалтинг фирмаси 2030 йилга бориб сунъий интеллект Жанубий-Шарқий Осиё ялпи ички маҳсулотига қарийб 1 триллион доллар ҳисса қўшиши мумкинлиги ҳақида фикр билдирган.