Архив сурат

Европа Иттифоқи кенгаши Россияга қарши санкцияларни четлаб ўтишни жиноят деб тан олиш қарорини маъқуллади. Европа Иттифоқи Кенгаши Европа Иттифоқи томонидан киритилган санкция чораларининг бузилишини жиноят деб тан олди. 

Чехия Адлия вазири Павел Блазек Россияга қарши санкциялар сиёсати зарурлиги ҳақида гапирар экан, «Бугунги қарор бу чораларни четлаб ўтишга бўлган ҳар қандай уринишлар тўхтатилишини таъминлаш учун энг муҳим воситадир» деди. Унинг таъкидлашича, жорий қилинган санкциялар Россия иқтисодиёти Украинадаги жанговар ҳаракатлар давом этишини таъминлай олмаслигига қаратилган.

Айтилишича, санкцияларни четлаб ўтишни жиноийлаштиришга Европа Иттифоқига аъзо давлатлар санкциялар сиёсати моҳиятини ноаниқ тушунишлари сабаб бўлган. Ушбу қарор жорий этилган чекловчи чораларни четлаб ўтиш хавфини бартараф этиши таъкидланган.

Баёнотда, шунингдек, Россияга қарши санкцияларни четлаб ўтишни жиноят деб тан олиш Европа Иттифоқи аъзолари томонидан умумевропа сиёсий йўналишига бир хил даражада виждонан риоя қилишга қаратилган икки қадамнинг биринчиси эканлиги таъкидланади.

24 ноябрь куни Еврокомиссия раҳбари Урсула фон дер Ляйен Европа Иттифоқи Россияга қарши санкцияларнинг тўққизинчи пакетини ишлаб чиқаётганини маълум қилган эди.

«Биз Россиянинг Украинага қарши уруш олиб бориш қобилиятини йўқотиш учун қаттиқ ишлаяпмиз. Айтишим мумкинки, биз санкцияларнинг тўққизинчи пакети устида тезликда ишлаяпмиз», деди у. Шу ўринда Ляйен яқин орада Россия нефтига нарх чегараси тасдиқланишини таъкидлади.

«Украина Россия президенти Владимир Путиннинг ноқонуний ва ваҳший уруши устидан ғалаба қозонмагунча тинчланмаймиз», — дея қўшимча қилди Европа комиссари.

Шу йилнинг 5 октябрь куни Европа Иттифоқи Россияга қарши саккизинчи санкциялар пакетини маъқуллаган эди. Унга кўра, Россия нефтига нархларнинг максимал чегараси жорий этилган. Шундан сўнг Владимир Путин Россия Федерацияси хом ашёси нархини максимал даражада оширишга уринаётган давлатларга нефть ва газ етказиб беришни бутунлай тўхтатиши ҳақида огоҳлантирганди.