Архив фото

Агар Тел-Авив Эрондаги режимни ўзгартиришга уринишларини давом эттирса, Исроил ядровий фалокат хавфига дуч келади. Бу ҳақда ISNA ахборот агентлиги номаълум ҳарбий манбага таяниб хабар берди.

«Агар АҚШ ва Исроил Эронда режимни ўзгартиришга уринса, Теҳрон Димонадаги ядровий реакторга зарба беради», — дейилади хабарда. Ҳозирча Ислом инқилоби қўриқчилари корпуси бу ахборотга расман изоҳ бермади.

2025 йилда Теҳрон ракеталар алмашинуви пайтида Димонага ҳужум қилди ва кейинги зарбалар эҳтимоли ҳақида огоҳлантирди. Ўз навбатида, АҚШ ҳаво кучлари Эроннинг учта ядровий иншооти жойлашган Форд, Натанз ва Исфаҳон шаҳарларига зарба берди.

Димонада нима бор?

Аҳолиси 40 000 дан сал кўпроқ бўлган Димона шаҳрида Исроилнинг иккита ядровий тадқиқот марказларидан бири жойлашган. Тасдиқланмаган хабарларга кўра, у ерда қурилган ядровий реактор қурол даражасидаги плутоний ишлаб чиқараётган бўлиши мумкин. Тахмин қилинишича, бу ерда ҳарбий мақсадлардан ташқари, муҳандислар техник ва тиббий мақсадлар учун радиоактив изотоплар ишлаб чиқарадилар.

Исроил тўққизта ядровий кучлардан бири ҳисобланади, аммо мамлакат оммавий қирғин қуролларига эга эканлигини расман на инкор этади, на тасдиқлайди. Аммо Исроилнинг собиқ бош вазири Голда Мейрнинг сўзлари анча машҳур бўлган: «Биринчидан, бизда ядровий қурол йўқ. Иккинчидан, агар керак бўлса, биз улардан фойдаланамиз».

Исроил ядровий қурол синовларини ўтказгани ҳақида аниқ маълумотлар йўқ. Стокгольм халқаро тинчлик тадқиқотлари институти маълумотларига кўра, Исроилда тахминан 80 та ядровий каллак бўлиши мумкин.

Мудофаа харажатлари ҳужум харажатларидан анча юқори

Шу йилнинг 28 февраль куни АҚШ ва Исроил Теҳронга қарши ҳарбий ҳаракатларни бошладилар. Ўз навбатида, Эрон Исроилга ҳамда Баҳрайн, Қатар, Қувайт ва Иорданиядаги АҚШ ҳарбий базаларига ракета ва дрон ҳужумларини уюштирди. Бундан ташқари, Эрон Ислом инқилоби қўриқчилари корпуси Ҳормуз бўғози орқали юк ташишни ёпишни буюрди.

Эроннинг арзон дронлардан фойдаланиши АҚШ ва унинг иттифоқчиларини иқтисодий жиҳатдан ноқулай аҳволга солиб қўяди, мудофаа харажатлари ҳужум харажатларидан анча юқори.

«New York Times» газетасидаги мақолада таъкидланишича, АҚШнинг «Patriot» ҳаво ҳужумидан мудофаа тизимлари ҳар бири тахминан 3 миллион долларга тушадиган ракеталар билан нишонларга зарба беради. Энг яхши ҳолатда ҳам уларнинг ушлаш-тўхтатиш нисбати ўндан бирга тенг, аммо Эрон фойдасига 60 ёки 70 дан бирга қадар етиши мумкин. Битта Эрон дронининг нархи эса 20 000 дан 50 000 долларгача туради.