Эрон Ташқи ишлар вазирлиги расмий вакили Исмоил Бағаий АҚШнинг низони ҳал қилиш бўйича таклифларини нореал деб атади, деб хабар бермоқда ТАСС.

— АҚШдан музокаралар бўйича таклиф тушганда, ҳамма ҳушёр бўлади. Дунё, ҳатто Американинг ўзидаги одамлар АҚШ дипломатиясини қанчалик ишончли деб ҳисоблашини билмайман. Турли Америка расмийларининг зиддиятли хатти-ҳаракатларига қарамай, Эроннинг турли масалалар бўйича позицияси бошидан аниқ эди. Биз ўзимиз учун қайси доиралар мақбул эканлигини яхши биламиз. Бизга турли номлар остида, масалан, 15 бандли ёки ундан кўп-кам кўринишда етказилган материаллар нореал, мантиқсиз бўлиб, ҳаддан ташқари юқори талабларни ўз ичига олган эди, — деди у.

Бағаийнинг сўзларига кўра, Теҳрон Вашингтоннинг музокаралар олиб боришга мойиллигига ишонмайди, чунки АҚШ музокаралар жараёни авжида бўлган бир пайтда аллақачон икки марта Эронга ҳужум қилган.

— Ҳозир биз АҚШнинг ҳарбий тажовузи янада кучлироқ шиддат билан давом этаётган шароитда турибмиз. Шу сабабли барча ҳаракатларимиз мудофаага қаратилган. Биз бу баёнотларни самимий деб ҳисобламаймиз. Биз бир йилдан камроқ вақт ичида икки марта юз берган дипломатияга хиёнатни ўз тажрибамизда ҳис қилдик, — деб таъкидлади Эрон ТИВ вакили.

Эслатиб ўтамиз, аввалроқ Америка етакчиси Дональд Трамп Эрон раҳбарияти АҚШ талабларининг катта қисмини бажаришга тайёрлигини билдираётганини маълум қилган эди.